कपिलवस्तु । कोभिड संकट विरुद्ध जुध्न नागरिक स्तरबाट गठन गरिएको साझा प्रयास अभियानको पहलमा बुद्धभूमि नगरपालिकालाई २ थान अक्सिजन कन्सन्टेटर मेशिन हस्तान्तरण गरिएको छ । साझा प्रयास अभियानका तर्फबाट बुद्धभूमि नगर संयोजक राजेश ज्ञवालीले नगर प्रमुख केशव सिंहलाई सो मेशिनहरु हस्तान्तरण गरेका हुन् ।
कपिलवस्तुमा कोभिड संक्रमित विरामीहरुको उपचारमा स्थानीय स्वास्थ्य संस्थाहरुलाई सघाउनका लागि फेसबुक क्याम्पेनिंगबाट संकलन गरिएको रकमबाट ३ लाख २० हजार रुपैयाका २ वटा अक्सिजन कन्सन्टेटर मेशिन हस्तान्तरण गरिएको अभियानका जिल्ला संयोजक रवि ठाकुरले बताए ।
कन्सन्टेटर मेशिन खरिदका लागि काठमाण्डौं स्थित पिआईए सिपिएन बाट ५० हजार, सुरेन्द्र ज्ञवालीबाट ५१ हजार, सुरेन्द्र राज आचार्यबाट २५ हजार लगायत राजेश श्रेष्ठ, कल्पना ठाकुर र सुप्रिया ठाकुरको सहयोग प्राप्त भएको अभियानका बुद्धभूमि नगर संयोजक राजेश ज्ञवालीले बताए ।
साझा प्रयास अभियानको यो मानवीय सेवामा हातेमालो गर्न बुद्धभूमि नगरपालिकाका तर्फबाट नगर प्रमुख केशव श्रेष्ठले पनि साझा प्रयास अभियानलाई २ लाख रुपैया सहयोग गरेका छन् ।
हस्तान्तरण कार्यक्रममा बुद्धभूमि नगरपालिकाका प्रमुख प्रशासकीय अधिकृत अनिल पौडेल, उप प्रमुख मीरा थारु, वडा अध्यक्ष कपिल देव तिवारी र साझा प्रयास अभियानका तर्फबाट दिनेश हमाल, सन्दीप गुप्ता, किरणमान बज्राचार्य, गोपाल भण्डारी लगायतको उपस्थिति रहेको थियो ।
