जनता समाजवादी पार्टी (जसपा) का अध्यक्ष महन्थ ठाकुरको पक्षले लुम्बिनी प्रदेश सभाका आफ्ना २ सांसदलाई २४ घण्टाको अल्टिमेटम दिँदै स्पष्टीकरण मागेको छ।
पार्टीको निर्देशनविपरीत लुम्बिनी प्रदेश सरकारको नीति तथा कार्यक्रमका पक्षमा मतदान नगरेको आरोपमा ठाकुर पक्षले अर्का अध्यक्ष उपेन्द्र यादवको पक्षका प्रदेश सांसद सहशराम यादव र पुर्मती ढेंगालाई यसबारे स्पष्टीकरण मागेको हो।
यसअघि ५ दिन समसीमा राखेर स्पष्टीकरण मागेको ठाकुर पक्षले पुनः अहिले २४ घण्टाको सीमा तोकेर स्पष्टीकरण दिन भनेको हो।अब २४ घण्टाभित्र स्पष्टीकरण नदिएमा पार्टीको विधानअनुसार कारबाही गर्ने ठाकुर पक्षले जनाएको छ। लुम्बिनी प्रदेशमा जसपाका ६ सांसद छन्। जसमध्ये चार जना पाण्डेसहित सन्तोषकुमार पाण्डे, विजयबहादुर यादव र सुमन शर्मा रायमाझी मन्त्री छन्।
उनीहरू अध्यक्ष ठाकुर पक्षका हुन्। अध्यक्ष ठाकुर पक्ष संघीय सरकारमा पनि सहभागी छ। अर्का अध्यक्ष यादव पक्ष भने विपक्षमा छ। यादव पक्षले मुख्यमन्त्री शंकर पोखरेलको सरकारमा सहभागी चार जना सांसदलाई पनि स्पष्टीकरण सोधेको छ।
