उपप्रधान तथा अर्थमन्त्री विष्णु पौडेलले ताजा जनादेशबाट नै मुलुकले निकास पाउने बताएका छन् ।
प्रतिनिधि सभाले वैकल्पिक सरकार समेत दिन नसकेपछि ताजा निर्वाचनमा जानुपर्ने बाध्यकारी अवस्था आएको पौडेलले स्पष्ट पारे ।
उकालीगण्डकी तिनाउ डाइभर्सन बहुउद्देश्यीय आयोजना कार्यालयको शनिवार बुटवलमा उद्घाटन गर्दै पौडेलले निर्वाचनका लागि तयार हुन सबै राजनीतिक दलहरूलाई आग्रह गरे ।
‘लोकतन्त्र र संविधानको प्राण निर्वाचन हो,’ उपप्रधानमन्त्री पौडेलले भने, ‘प्रधानमन्त्रीले नयाँ सरकार निर्माणका लागि मार्गप्रशस्त गर्नुभयो । प्रतिनिधि सभाले पनि वैकल्पिक सरकार गठन गर्न सकेन । त्यही भएर प्रतिनिधिसभा भंग गरी निर्वाचनको मिति तय भएको हो । आउँदो मंसिरमा हुने निर्वाचनले नै मुलुकलाई निकास दिनेछ ।’
नेता पौडेलले थपे, ‘निर्वाचनको तयारीमा सबै लाग्नुहोस् । संविधान निर्माणपछि मुलुकको एउटा मात्र लक्ष्य विकास र समृद्धि होला भन्ने थियो । तर देशमा अनपेक्षित परिदृश्य देखा परे । त्यसैले आउँदो निर्वाचनले देशको विकास, समृद्धि र स्थायित्व दिनेछ । त्यसैले निर्वाचनमा जान दलहरू डराउनु हुँदैन ।’
सरकार अहिले कोरोनाबाट जनताको जीवन रक्षामा केन्द्रित भएको समेत मन्त्री पौडेलले बताए । निर्वाचनसम्म जनतालाई निःशुल्क कोरोनाको भ्याक्सिन उपलब्ध गराएर माक्स विना मतदान गर्ने वातावरण सरकारले मिलाउन लागेको मन्त्री पौडेलले बताए ।
कालीगण्डकी तिनाउ डाइभर्सनले रुपन्देही, कपिलवस्तु र नवलपरासीको विकासमा ठूलो महत्त्व राख्ने पौडेलले बताए । आयोजनाको प्रभावकारी कार्यान्वनमा शंका गर्ने ठाउँ अब समाप्त भएको उपप्रधानमन्त्री पौडेलले बताए । ‘यो यस क्षेत्रको ‘गेम चेन्जर’ राष्ट्रिय गौरवको आयोजना हो,’ अर्थमन्त्री पौडेलले भने, ‘आयोजनाले राष्ट्रको मुहार बदल्ने छ । यस क्षेत्रमा कायापलट हुनेछ ।’
आयोजनाबाट १ लाख ७ हजार हेक्टर जमिनमा सिँचाइ सुविधा पुग्नेछ । अन्तर जलाधार पानी स्थानान्तरणबाट कालीगण्डकीको पानी तिनाउमा खसालिने छ । यो आयोजनाको परिकल्पना पौडेलले २०६७ सालमा जलस्रोत तथा सिँचाइमन्त्री हुँदा गरेका थिए ।
