कपिलवस्तु, भदौ २७ गते । बाणगंगा नदीमा आएको एक्कासी बाढीमा फसेका दुई दाजुभाइमध्ये सशस्त्र प्रहरीद्वारा दाइको सकुशल उद्धार गरिएको छ भने भाइ अझै बेपत्ता छन् । बाणगंगा नगरपालिका–८ बोडगाउँका १८ वर्षीय रिदम लामा र उनका १० वर्षीय भाइ बुद्ध लामा बाणगंगा नगरपालिका–४ स्थित बाणगंगा नदीमा नुहाउन गएका बेला एक्कासी नदीको बहाव बढेपछि फसेका थिए । नदीको बीचमा रहेको टापुमा रुखमा चढेर बसेका रिदमको सशस्त्र प्रहरीको टोलीले सकुशल उद्धार गरेको हो ।
शनिबार साँझ करिब ६ बजेतिर रबर बोटको प्रयोग गरी उद्धार टोलीले रिदमलाई सकुशल उद्धार गरेको सशस्त्र प्रहरी २८ नंं. गणका सशस्त्र प्रहरी उपरिक्षक गोपाल अधिकारीले बताउनुभयो ।
उहाँका अनुसार नदीमा एक्कासी बाढी आएपछि दुवै दाजुभाइ फसेको सूचना प्राप्त हुनासाथ नेपाल प्रहरी र सशस्त्र प्रहरीको संयुक्त टोली उद्धारमा परिचालन गरिएको थियो । रिदमलाई उद्धार गरिए पनि उनका भाइ बुद्ध भने घटनास्थलमा फेला नपरेपछि खोजी कार्य जारी राखिएको छ ।
सशस्त्र प्रहरी उपरीक्षक अधिकारीले नदीको बहाव बढेका कारण रिदम नदीको बीचमा फसेको र सुरक्षाकर्मीले जोखिम मोलेर उद्धार गरेको जानकारी दिनुभयो ।
सशस्त्र प्रहरीद्वारा दाइको सकुशल उद्धार, भाइ अझै बेपत्ता
