पूर्व राजा ज्ञानेन्द्र शाहले यस वर्ष आफ्नो जन्मोत्सव ‘उत्सव’को रूपमा नमनाउने जानकारी दिनुभएको छ । बुधबार नेपालीजनका नाममा एक सन्देश जारी गर्दै उहाँले यतिबेला जनतामा पैदा भएको निराशा तथा आमजनताले भोग्नुपरेको पीडालाई ध्यानमा राख्दै यही असार २३ गतेको जन्मदिनलाई उत्सवका रूपमा नमनाउने निर्णय गरेको जानकारी दिनुभएको हो ।
पूर्व राजाद्वारा जारी सन्देशमा भनिएको छ- ‘आजको विश्व एकतर्फ नयाँ ज्ञान विज्ञान र अत्याधुनिक प्रविधिको विकासमा अघि बढिरहेको छ भने दुर्भाग्यवश हाम्रो जीवन र जगतलाई विविध प्रकारका नयाँ रोगब्याधि र महामारीले सताइरहेको छ । यही क्रममा यसै वर्षको प्रारम्भिक चरणमा हामी पनि अस्वस्थ रह्यौँ । सहयोगी स्वास्थ्यकर्मीहरूको कर्तव्यपूर्वक उपचार शुभेच्छुकहरूको शुभकामना र याचनाकै कारण हाम्रो स्वास्थ्यमा सुधार आएको छ ।’
सन्देशमा अगाडि भनिएको छ- ‘राजनीति, राज्य प्रणाली एवं राजकाजको प्रबन्ध र व्यवस्थापन संक्रमण, संकट र अन्योलको अवस्थामा देखापरेको छ । परिवर्तन र अग्रगमनका चर्का नारा घन्काएर जति नै रुपान्तरण गरे पनि जनताले ठोस सुख-सुविधा नपाइरहेको बुझिएको छ । आफ्ना मूल्य, मान्यता तथा अस्तित्वलाई समाप्त पार्ने तर सही सिर्जना र सार दिन नसक्नाले आज नेपाली जनताको मन अशान्त रहेको छ । कोरोनाको खोप उपचार पाउन नसकेका कतिपय नेपाली निराश छन् । यसैगरी देशमा वर्षादको यो समय प्राकृतिक विपद्को वेदना पनि उत्तिकै छ, जनजीवन दुःखद् छ ।’
‘जनतामा पैदा भएको निराशा तथा भोग्नु परेको पीडालाई ध्यानमा राख्दै हामीले यही असार २३ गतेको जन्मदिनलाई उत्सवका रूपमा नमनाउने निर्णय गरेका छौँ । सबै नेपाली र देशी–विदेशी शुभचिन्तकहरूबाट प्रकट हुने सद्भाव तथा शुभकामनाप्रति हाम्रो हार्दिक धन्यवाद छ ।’
‘श्री पशुपतिनाथले हामी सबैको कल्याण गरून् । जय नेपाल !’
