तौलिहवा (कपिलवस्तु), जेठ १९ गते । जिल्लाको कपिलवस्तु नगरपालिकाले ज्येष्ठ नागरिकलाई गाउँमै स्वास्थ्य सेवा उपलब्ध गराउन सामुदायिक मोबाइल स्वास्थ्य क्लिनिक सेवा सञ्चालनमा ल्याएको छ । मङ्गलबार आयोजित कार्यक्रममा नगर प्रमुख सुदीप पौडेलले मोबाइल स्वास्थ्य क्लिनिक सेवाको शुभारम्भ गर्नुभयो ।
मोबाइल स्वास्थ्य क्लिनिक सञ्चालनका लागि चुजी फाउन्डेसनले कपिलवस्तु नगरपालिकालाई स्वास्थ्य सेवा भ्यान उपलब्ध गराएको हो । उक्त भ्यान मार्फत नगरपालिकाका १२ वटै वडामा पुगेर स्वास्थ्य सेवा प्रदान गरिनेछ ।
नगरपालिकाका अनुसार प्रत्येक वडामा दुई दिनका दरले मोबाइल क्लिनिक सञ्चालन हुनेछ । सेवाको पहिलो दिन वडा नं. १२ स्थित बिठुवा गाउँमा स्वास्थ्य परीक्षण कार्यक्रम सञ्चालन गरिएको छ ।
मोबाइल स्वास्थ्य क्लिनिकमा एक जना एमबीबीएस चिकित्सक, एक जना स्टाफ नर्स र एक जना ल्याब टेक्निसियन सहितको स्वास्थ्यकर्मी टोली खटाइएको छ । क्लिनिक मार्फत विशेषगरी ६० वर्षभन्दा माथिका ज्येष्ठ नागरिकलाई लक्षित गरी स्वास्थ्य परीक्षण तथा परामर्श सेवा प्रदान गरिनेछ ।
सेवाअन्तर्गत रक्तचाप, रगतमा चिनीको मात्रा (ब्लड सुगर), पिसाब परीक्षण लगायतका आधारभूत स्वास्थ्य जाँच गरिनेछ । साथै मोबाइल क्लिनिक भ्यानमा भिडियो एक्स–रे तथा सामान्य प्रयोगशाला परीक्षणको सुविधा समेत रहेको नगरपालिकाले जनाएको छ ।
कार्यक्रममा नगर प्रमुख पौडेलले स्वास्थ्य सेवामा सबै नागरिकको पहुँच विस्तार गर्न मोबाइल क्लिनिक सञ्चालन गरिएको बताउनुभयो । उहाँले विशेषगरी ग्रामीण क्षेत्रका ज्येष्ठ नागरिकलाई घर नजिकै गुणस्तरीय स्वास्थ्य सेवा उपलब्ध गराउन यस कार्यक्रमले महत्वपूर्ण भूमिका खेल्ने विश्वास व्यक्त गर्नुभयो ।
नगरपालिकाका स्वास्थ्य शाखा प्रमुख उमेश गुप्ताले मोबाइल स्वास्थ्य क्लिनिकले नागरिकलाई आफ्नै गाउँठाउँमा स्वास्थ्य सेवा उपलब्ध गराउने बताउनुभयो । उहाँले समयमै स्वास्थ्य परीक्षण गर्न सकिने भएकाले रोगको पहिचान र उपचारमा समेत सहजता हुने उल्लेख गर्नुभयो ।
सामुदायिक मोबाइल स्वास्थ्य क्लिनिक सञ्चालनसँगै नगरपालिकाभित्रका ज्येष्ठ नागरिकले नियमित स्वास्थ्य परीक्षण तथा परामर्श सेवा सहज रूपमा प्राप्त गर्ने अपेक्षा गरिएको छ । यस कार्यक्रमले स्वास्थ्य सेवाको पहुँच विस्तार गर्नुका साथै समुदायस्तरमै प्रारम्भिक स्वास्थ्य परीक्षणलाई प्रभावकारी बनाउने विश्वास लिइएको छ ।
कपिलबस्तुमा सामुदायिक मोबाइल स्वास्थ्य क्लिनिक सेवा सुरु
