रौतहटको कटहरिया नगरपालिकाका नगरप्रमुख सियाराम कुश्वाहाले एकै कार्यकालको लागि तीनचोटी पदभार ग्रहण गरेका छन् । सर्वोच्च अदालतले रौतहटका दुई नगरपालिकाका नगरप्रमुखको पद पुनर्बहाली गरेसँगै कटहरिया नगरपालिकाका नगर प्रमुख कुश्वाहाले बिहीबार पुनः पदभार ग्रहण गरेका हुन् ।
उनका समर्थकहरूले फूलमाला र टीका लगाएर नगरपालिका कार्यालयमा उनको स्वागत गरेका थिए । बिहीबारदेखि कुश्वाहाले नगरपालिकाको कामकाज औपचारिक रुपमा पुनः सम्हालेका छन् । जिल्लाको मौलापुर र कटहरिया नगरपालिकाका नगरप्रमुखले दल त्याग गरेको जनाउँदै रौतहटका दुई नगरप्रमुखसहित ७ जनाको पद रिक्त भएको निर्वाचन आयोगले गत असार ११ गते एक सुचनामार्फत जनाएको थियो ।
तर सर्वोच्च अदालतले गत मंगलबार दुवै नगरपालिका मौलापुर नगरपालिकाका नगरप्रमुख रिनाकुमारी साह र कटहरिया नगरपालिकाका नगरप्रमुख सियाराम कुशवाहको पद पुनर्बहाली गरिदिएको थियो । पदमुक्त गर्ने निर्वाचन आयोगको निर्णय तत्काल कार्यान्वयन नगर्न अन्तरिम आदेश दिएसँगै रौतहटका दुवै नगर प्रमुखको पद पुनर्वाहाली भएको हो ।
न्यायाधीश कुमार चुडालको एकल इजलासले मंगलबार साह र कुशवाहको रिटमाथि प्रारम्भिक सुनुवाइ गर्दै निवेदकले नेकपा माओवादी केन्द्र छाडेर अर्को दल गठन गरेको वा अर्को दलमा प्रवेश गरेको यकिन हुन नसकेको भन्दै नगरप्रमुख पदमा पुनर्बहाली गरिदिएको हो ।
आदेशमा प्रत्यक्ष जननिर्वाचित स्थानीय कार्यपालिकाको प्रमुखहरू भएकाले उनीहरुले सम्पादन गर्नुपर्ने स्थानीय तहसम्बन्धी काम कारवाही एवम् अधिकारमा अपूरणीय क्षति पुग्ने भएकाले मुद्दाको टुंगो नलाग्दासम्म निर्वाचन आयोगले गरेको निर्णय कार्यान्वयन नगर्न भनिएको छ ।
नेकपा माओवादी केन्द्रले गत वैशाख १४ गते निर्वाचन आयोगमा नगरप्रमुख साह र कुशवाहसहित विभिन्न जिल्लाका १४ जना स्थानीय जनप्रतिनिधिले दल त्याग गरेर एमालेमा प्रवेश गरेको भन्दै पदमुक्त गर्न पत्र पठाएको थियो । सो पत्रका आधारमा आयोगले असार ११ गते उनीहरू पदमुक्त भएको सूचना निकालेको थियो ।
यसअघि पनि विभिन्न जिल्लाका स्थानीय तहका जनप्रतिनिधि अन्तरिम आदेशबाट पुनर्वहाली भएका छन् । यस अघि पनि मेयर कुश्वाहा काशीनाथ तिवारी काण्डमा जेलबाट छुटेर आएपछि पदभार ग्रहण गरेका थिए । मौलापुर नगरप्रमुख रिना कुमारी साहले पनि गत बुधबार पुनः पदभार ग्रहण गरेकी थिइन् ।
