काठमाडौं । सुजिता भण्डारीको शव पोस्टमार्टमका लागि काठमाडौं ल्याइएको छ। चितवनमा बेपत्ता भएको ९ दिनपछि जंगलमा मृत भेटिएकी २३ वर्षीया भण्डारीको शव काठमाडौं ल्याइएको हो ।
चितवन जिल्ला प्रहरी कार्यालयका प्रवक्ता सूर्यबहादुर थापाले हिजै राति शव पठाइएको र आज बिहान काठमाडौंको महाराजगन्जस्थित त्रिवि शिक्षण अस्पतालमा पुर्याइएको जानकारी दिनुभयो ।
डीएसपी थापाले घटनाबारे गम्भीर ढंगले अनुसन्धान भइरहेको तर अहिलेसम्म कुनै तथ्य नखुलेको बताउनुभयो ।
सोधपुछ धेरै जनासँग गरिए पनि अहिलेसम्म कसैलाई नियन्त्रणमा नलिइएको डीएसपी थापाको भनाइ छ।
चितवनको राप्ती नगरपालिका–३ की सुजिता भण्डारी यही असार ११ गते बिहान ६ बजे साथीको घर जाने भनेर आफ्नो घरबाट निस्केकी थिइन्।
दिउँसोतिर आफू अपहरणमा परेको भन्दै अस्पष्ट आवाजमा फोन गरेको परिवारजनले बताएका छन्। त्यसपछि सम्पर्क हुन नसकेकी सुजिता आइतबार साँझ स्थानीय ब्रह्मस्थाानी सामुदायिक वनमा मृत फेला परेकी हुन्।
