काठमाडौं । नेपाली काँग्रेसको केन्द्रदेखि जिल्ला तहसम्म १४औं महाधिवेशनको रौनक बढेको छ । केन्द्रमा सभापतिका आकांक्षीले दाबी प्रस्तुत गरिराख्दा उता जिल्ला सभापतिका दाबेदारको पनि दौडधुप सुरु भएको छ ।
सो पार्टीमा अब वडा तहका अधिवेशनहरु सुरु हुन २० दिन मात्र बाँकी छ । १२ साउनदेखि वडा तहको अधिवेशन सुरु हुनेछ । त्यसपछि १६ साउनमा पालिका, २० साउनमा प्रदेश सभा, क्षेत्र र २३ साउनमा प्रतिनिधिसभा निर्वाचन क्षेत्र एवं जिल्लाको अधिवेशन हुनेछ ।
त्यस्तै, एकभन्दा बढी निर्वाचन क्षेत्रहरु भएका जिल्लाको अधिवेशन २६ साउनमा हुनेछ भने भदौ १ र २ गते सातै प्रदेशको अधिवेशन हुनेछ । त्यसपछि भदौ १६–१९ गते काठमाडौंमा १४ औं महाधिवेशन हुने काँग्रेसको कार्यतालिका छ । यससँगै, काँग्रेसमा केन्द्र र जिल्ला अधिवेशनको चर्चा र चासो बढेको छ ।
खासगरी पहिलोपटक बन्न लागेका प्रदेश कमिटीहरुमा जिल्ला सभापतिबाट रिङआउट भएका र केन्द्रीय पदाधिकारीमा ‘हाइट’ नपुगेका नेताहरुको नजर परेको देखिन्छ । यसका लागि स्थानीय कार्यकर्ता सँगसँगै केन्द्रमा पनि नेतृत्वसँगको लबिङलाई जिल्ला नेताहरुले तीव्र बनाउन थालेका छन् ।
सुदूरपश्चिम प्रदेशमा काँग्रेस सभापति शेरबहादुर देउवाको गृहजिल्ला पनि पर्छ । १३औं महाधिवेशनमा ९ जिल्ला मध्ये ६ जिल्लाका सभापतिमा देउवा निकट नेताहरु निर्वाचित भएका थिए । सुदूरपश्चिमको दार्चुला बाहेक सबै जिल्लामा देउवाको जबरजस्त उपस्थिति छ ।
यद्यपि १३औं महाधिवेशनमा गृहजिल्ला डडेल्धुरामा देउवालाई आफ्ना पूर्वसहयोगी कर्णबहादुर मल्लले चुनौती दिएका थिए । बैतडी जिल्ला सभापतिमा पनि वरिष्ठ नेता रामचन्द्र पौडेल पक्षले बाजी मारेको थियो ।
कतिपय जिल्लामा केन्द्रीय सदस्यद्वय एनपी साउद र रमेश लेखकको टकरावले पनि देउवा टीममा समस्या खडा गरेको थियो । यसपटक पनि अधिकांश जिल्लामा ‘देउवा भर्सेस देउवा’कै अवस्था छ ।
