भैरहवा । १० वर्षदेखि भाडाको घरबाट सेवा दिँदै आएको सिद्धार्थनगर सिटी अस्पताल प्रा.लि.ले आफ्नै भवनबाट थप सुविधा सहित चिकित्सकिय सेवा सुरु गरेको छ । मायादेवी गाउँपालिका वडा नम्बर ८ मा प्रालीले ८० करोड बढी लागतमा निर्माण गरेको भवनबाट सेवा सुरु गरेको जनाएको छ । भारतीय सिमा नजिक रहेको कारण भारतको महाराजगञ्ज, सिद्धार्थनगर जिल्लाका साथै नेपालको उत्तरी भेग गुल्मी, अर्घाखाँची, पाल्पा, दाङ लगायतका अन्य जिल्लाका बिरामीलाई सेवा दिदै आएको अस्पतालले आफ्नो सेवा बिस्तार गरेको समेत जनाएको छ ।
भैरहवामा पत्रकार सम्मेलनको आयोजना गर्दै अस्पतालका प्रवन्ध निर्देशक अर्जुन पौडेलले गुणस्तरीय सेवा प्रदान गर्नका लागी काठमाण्डौंका ख्यातीप्राप्त ग्राण्डी अस्पताल अस्पताल तथा मेडिसिटी अस्पतालमा लामो अनुभव प्राप्त गरेको चिकित्सकको टोलीद्वारा सेवा प्रदान गरिरहेको जनाए । रोग पहिचान तथा उपचारका लागी आवश्यक पर्ने अत्याधुनिक प्रविधि तथा उपकरणहरु, प्रयोगशालामा हुने अटोमेटिक एनालाईजर, ६४ स्लाईस सिटी स्क्यान, मोड्युलर अपरेशन, आईसियुका लागी भेन्टिलेटर लगायतको ब्यवस्था गरिएको पौडेलले जानकारी दिए । यस्तै अस्पतालले हाडजोर्नी तथा मेरुदण्ड अपरेशन सेवा, दुरविनबाट गरिने पत्थरी लगायत सम्पूर्ण अपरेशन सेवा, डाईलासिस सेवा, छाला सम्बन्धि लेजर सर्जरी तथा कपाल प्रत्यारोपण सेवा प्रदान गरिरहेको उनले जानकारी दिए ।
नवनिर्मित अस्पताल भवनमा डिलक्स तथा नर्मल क्यबिनको ब्यवस्था गरिएको अस्पतालका आकस्मिक कक्ष ईन्चार्ज डाक्टर अमित चतुर्वेदीले जानकारी दिए । उनले लुम्बिनी अन्र्तराष्ट्रिय बिमानस्थलको नजिकै यो अस्पताल रहेको कारण बिमानस्थलमा आउने बिरामी पाहुनालाई लक्षित गरि ३ वटा अब्र्जवेशन बेड र २ वटा स्वीट सहित अन्र्तराष्ट्रिय युनिट बनाईएको बताए ।
५५ हजार स्क्वायर फिटमा निर्माण भएको भवनबाट अझ गुणस्तरिय र किफायती तरिकाले उपचार गर्ने अस्पतालका अध्यक्ष डाक्टर सुवोध पाण्डेले बताए । उनले कोभिडको कारण पूर्ण रुपमा सञ्चालनमा आउन नसकेको अस्पताल अबको २÷३ महिनामै पूर्ण रुपमा सञ्चालनमा ल्याउने दावी दिए । रुपन्देही मेडिकल हबको रुपमा बिकसित भए पनि सिद्धार्थनगर सिटी अस्पतालले आफ्ना बिरामीलाई स्थानिय स्तरमै राष्ट्रिय स्तरको उपचार उचित मूल्यमै गर्ने पाण्डेको भनाई थियो । २०६८ सालमा १५ शैयाको अस्पतालको रुपमा स्थापना भएको यो अस्पताल अहिले स्तरवृद्धि गरि ५० शैयाको सेवा अब आफनै भवनबाट दिने भएको हो ।
