जिल्ला प्रशासन कार्यालय डडेल्धुराले एक महिलाको नागरिकता प्रतिलिपीमा पुरुषको तस्बिर टाँसेर जारी गरेको पाइएको छ । जिल्ला प्रशासन कार्यालयले जन्मस्थान अमरगढी नगरपालिका–१ भनेर ठेगाना उल्लेख गरिएको देवकी धामीको नागरिकता प्रमाणपत्रमा एक पुरुषको फोटो राखेर त्रुटि गरेको पाइएको हो ।
जिल्लाको भागेश्वर गाउँपालिका-४ स्थायी ठेगाना उल्लेख गरिएको नागरिकतामा देवकी धामीको नाम छ भने तस्बिर पुरुषको टाँसिएको छ । उक्त नागरिकताको प्रतिलिपिमा सहायक प्रमुख जिल्ला अधिकारी बाबुराम अर्यालले हस्ताक्षर गरेका छन् ।
नागरिकताको दोस्रो प्रतिलिपिको ‘लिङ्ग‘ महलमा स्पष्टसँग ‘महिला’ उल्लेख गरिएको छ । महिलाका पतिको नाम नवराज धामी छ । उनको जन्मस्थान अमरगढी नगरपालिका-१ उल्लेख गरिएको छ ।
२०७८ असार २३ गते जारी गरिएको ७४-०१-७१-०१५१० को नागरिकता प्रतिलिपिमा प्रशासनको लापर्वाही स्पष्टै महसूस गर्न सकिन्छ ।
धामीको नागरिकतामा अजयमेरु गाउँपालिका-१ समैजीका राजबहादुर भण्डारीको तस्बिर टाँसिएको हो । उक्त नागरिकता प्रमाणपत्र भण्डारीसँगै छ । भण्डारीको नाम ठेगाना उल्लेख भएको नागरिकतामा चाहिँ धामीको तस्बिर टाँसेर दिइएको हुन सक्ने अनुमान गरिएको छ ।
यस विषयमा जिल्ला प्रशासन कार्यालयले ‘काम गर्दै जाँदा कारणवश त्रुटि भएको हुन सक्ने भन्दै सम्बन्धित व्यक्तिलाई बोलाएर त्रुटी सच्याइसकेको जनाएको छ ।
-डम्बर निदाल, डडेल्धुरा
