काठमाडौं । सत्तारुढ दल नेपाली कांग्रेसको संसदीय दलको बैठक जारी छ । आइतबार (आज) दिउँसो पौने तीन बजे अन्तर्राष्ट्रिय सम्मेलन केन्द्रको भवन नयाँ बानेश्वरमा बैठक शुरु भएको हो । बैठकमा विश्वासको मतसँगै विविध विषयमा छलफल भइरहेको बैठकस्थलबाट सचेतक पुष्पा भुसालले बताइन् । ‘बैठक जारी छ,’ भुसालले भनिन्— ‘आज प्रधानमन्त्रीज्यूले विश्वासको मत लिँदै हुनुहुन्छ । यसपछि आकस्मिक रुपमा बैठक बसेको हो । विश्वासको मतसँगै विविध विषयमा छलपल भइरहेको छ ।’
सर्वोच्चको परमादेशबाट प्रधानमन्त्री बनेका कांग्रेस संसदीयका दलका नेता देउवाले आज संविधानको धारा ७६ (४) बमोजिम विश्वासको मत लिँदैछन् । यसका लागि संसद् सचिवालयले तयारीसमेत पूरा गरिसकेको छ । देउवाले विश्वासको मत पाउने निश्चितजस्तै छ । यद्यपि प्रधानमन्त्री बनाउन हस्ताक्षर गरेका विपक्षी एमालेका कपितय नेताहरुले भने एमाले भाँड्नेगरी आजै विश्वासको मत लिन खोजिएको आरोप लगाइरहेका छन् । एमाले सचिवसमेत रहेका विपक्षी एमाले नेता भीम आचार्यले भने— ‘आजै विश्वासको मत लिनुखोज्नु चाहिँ एमाले एकता भाँड्नु र एमाले विभाजन गर्नु कुत्सित मनसाय बनाउनुभन्दा अरु केही होइन ।’
सर्वोच्चको आदेशबमोजिम मन्त्रिपरिषद्को सिफारिसमा राष्ट्रपति विद्यादेवी भण्डारीले आह्वान गरेको प्रतिनिधि सभाको बैठक आजै अपराह्न ४ बजेबाट बस्दैछ । जहाँ प्रधानमन्त्री देउवाले विश्वासको मत लिने कार्यसूची रहेको छ ।
