काठमाडौं । जनता समाजवादी पार्टीका अध्यक्ष महन्थ ठाकुरले बुधबार बिहानै प्रधानमन्त्री शेरबहादुर देउवासँग भेटवार्ता गर्नुभएको छ ।
प्रधानमन्त्रीको सरकारी निवास बालुवाटारमै गएर अध्यक्ष ठाकुरले उहाँसाग भेटवार्ता गर्नुभएको हो । मंगलवार विश्वासको मत दिनु अघि आफूले गरेका प्रतिबद्धताहरु पूरा गर्न ध्यानाकर्षण गराउनुभएका अध्यक्ष ठाकुर आज बालुवाटार जानुलाई अर्थपूर्ण रुपमा हेरिएको छ ।
त्यस क्रममा दुई नेताबीच सरकारमा सहभागिताका विषयमा पनि छलफल भएको स्रोतले जनाएको छ।यसबाहेक ठाकुरले यसअघि आफ्नो पार्टीसँग सकारले गरेका सहमति कार्यान्वनयका विषयमा प्रधानमन्त्री देउवासँग कुरा राखेको स्रोतले जानकारी दिएको छ।
यसअघि ओली सरकारमा सहभागी भएको जसपाको ठाकुर पक्षले समेत गत आइतबार प्रतिनिधि सभामा देउवालाई विश्वासको मत दिएको थियो। यो भेटसँगै ओलीको सत्ता ढलेर देउवा प्रधानमन्त्री हुनासाथ कित्ता फेरेको ठाकुर पक्ष अहिलेको सरकारमा पनि सहभागी हुने सम्भावना बढेको छ।
उता देउवालाई प्रधानमन्त्री बनाउन राष्ट्रपति कार्यालयदेखि सर्वोच्च अदालतसम्म साथ दिएको जसपाकै अर्का अध्यक्ष उपेन्द्र यादवको समूह त सरकारमा जाने निश्चित छ। देउवाले अहिलेसम्म कांग्रेसबाट दुई र माओवादी केन्द्रबाट दुई मन्त्री मात्र नियुक्त गर्नुभएको छ । मन्त्रिपरिषद् विस्तारबारे देउवा छलफलमै व्यस्त हुनुहुन्छ ।
उहाँले आफूलाई प्रधानमन्त्री बन्न सहयोग गर्ने एमाले माधव नेपालको पक्षलाई पनि सरकारमा सहभागी हुन आग्रह गरिरहेको कारण मन्त्री थप्न केही समय ढिला हुनसक्ने देखिएको छ ।
