कपिलवस्तु । साझा न्यूज
जय गुरुदेवका अनुयायी भक्तजनहरुबाट सदरमुकाम तौलिहवा क्षेत्रमा निशुल्क खाना तथा नास्ता वितरण कार्यक्रम संचालन गरिएको छ । कोभिड संक्रमणका कारण जारी लक डाउनको अवधिमा आर्थिक समस्यामा परेका मजदुर, बाटो हिड्ने बटुवा, अस्पतालका विरामी र कुरुवा तथा बाल गृहका बालबालिकाहरु र सरकारी कार्यालयमा सेवा लिन आउने सेवाग्राहीलाई १ महिना अघि बाट यसरी निशुल्क रुपमा भोजन तथा नास्ता वितरण गरिएको छ ।
जय गुरुदेवका स्थानीय अनुयायी रमेश उपाध्याय र पुष्पा उपाध्यायको संयोजन तथा जय गुरुदेवका अन्य अनुयायीहरुको सक्रियतामा तौलिहवा क्षेत्रमा १ महिना अघिबाट निशुल्क खाना तास्ता वितरण कार्यक्रमलाई अघि बढाईएको हो । हरेक दिन खाना नास्ता तयार गर्न समूह विभाजन गरेर जय गुरुदेवका करीब २५ जना भक्तहरु खटिने गरेका छन् ।
जय गुरुदेवका भक्त र अन्य शाकाहारी व्यक्तिले दिएको सहयोगबाट यो कार्यक्रम संचालन गरिएको र यसलाई निरन्तर रुपमा संचालन गर्दै लगिने कार्यक्रमकी संयोजक पुष्पा उपाध्यायले बताईन् । हामीलाई थुप्रै व्यक्तिहरुबाट सहयोगको लागि प्रस्ताव आयो, तर हामी शाकाहारी व्यक्तिको मात्रै सहयोग लिन्छौं, संयोजक पुष्पाले भनिन्, “यो अभियानलाई हामी यसै गरी निरन्तर रुपमा अघि बढाउंदै जान्छौं, सहयोग त गुरुदेवको कृपाबाट कहिं कतैबाट भै नै हाल्छ ।”
जय गुरुदेवको यो अभियानबाट दैनिक ज्यालादारी गर्ने मजदुर, अस्पतालका विरामी तथा कुरुवा, सरकारी कार्यालयमा आउने सेवाग्राही, कपिलवस्तु बाललगृहका बालबालिकाहरु गरी दैनिक ५ सय जना सर्वसाधारणले निशुल्क भोजन तथा नास्ता ग्रहण गर्ने गरेका छन् ।
