काठमाडौं । नेपालका १५ वटा बैंकहरुको सिस्टम ह्याक गर्ने चेतावनीसहितको सूचना आएपछि हंगामा मच्चिएको छ ।
नेपाल राष्ट्र बैंक, कुमारी बैंक, नेपाल बैंक, नविल बैंक, राष्ट्रिय बाणिज्य बैंक, माछापुछ्रे, एमएमबी, एनआसी एसिया,बैंक अफ काठमाडौं, सिटिजन, सानीमा, एसबीआइ, एभरेस्ट, नेपाल इन्भेस्टमेन्ट, हिमालयन बैंकको सिस्टम ह्याक गरेर ठूलो क्षति पुर्याउने चेतावनी इमेल र फोन मार्फत आएको हो।
नेपाल राष्ट्र बैंकका प्रवक्ता देवकुमार ढकाल, सहप्रवक्ता नारायण पोखरेलसहितका उच्च अधिकारीलाई बैंकहरुको सिस्टम ह्याक गरि रकम लैजाने चेतावनीयुक्त मेज आएपपछि तरंग मच्चिएको छ ।
राष्ट्र बैंकका प्रवक्ता देवकुमार ढकालले इमले र फोनमा सानो म्यासेज आएको बताउँदै भन्नुभयो, धम्की भन्दा पनि सानो म्यासेज आएको थियो, म्यासेज आउनासाथ हामीले रातिनै सबै डेटाहरु चेक गर्यौं। त्यस्तो आतंकित हुनुपर्ने केही छैन।
अहिलेपनि आफूहरुले सिस्टम लाई सुक्ष्मरुपमा हेरिरहेको उहाँको भनाइ छ।
प्रवक्ता ढकालले आफूहरुलाई प्राप्त भएको सूचनाबारे बैंक र अन्य सम्बन्धित निकायलाई जानकारी दिएको बताउनुभयो। उहाँले भन्नुभयो, हामीले हिजै यसबारे बैंकहरुलाई र अन्यपक्षलाई पनि सूचना दिइसकेका छौं। उहाँहरुले पनि आफ्नो ठाउँबाट सुरक्षा अपनाउने काम गरिरहनु भएको छ। त्यसैले हल्लाहरुको पछि लाग्नुपर्ने आवश्यकता छैन ।
ह्याक गर्ने चेतावनी दिइएको म्यासेजमा ठूलो क्षति रोक्नका लागि सबै शाखा ४८ घन्टा बन्द गर्न भनिएको छ भने पत्रलाई सामान्यरुपमा नलिन चेतावनी दिइएको छ।
राष्ट्र बैंकका अधिकारीहरुलाई बैंक ह्याक गर्ने चेतावनीयुक्त म्यासज आएको भएपनि नेपाल प्रहरीले भने आफूहरुलाई यसबारे केही जानकारी नआएको बताएको छ।
यता राष्ट्र बैंकका सहप्रवक्ता नारायणप्रसाद पोखरेलले त्यस्तो धम्की दिनेको पहिचान गर्न आइटी डिपार्टका कर्मचारी खटिसकेको र प्रहरीको सहयोग जरुरत परेमा लिने बताउनुभयो ।
‘भाइबरमा यस्ता फेक सूचना आएका रहेछन्, यस्तो काम गर्नेको खोजी भइरहेको छ,’ उहाँले भन्नुभयो, ‘कुनै ह्याकरले इमेल गरेको पनि होइन। यो त भाइबरमा आएको फेक धम्की हो। प्रहरीको सहयोगमा यस्तो सूचना पठाउनेको खोजी गरिँदैछ।’
उहाँले ह्याकरले बाजा बजाएर ह्याक नगर्ने पनि बताउँदै भन्नुभयो, ‘कसैले बाजा बजाएर सिष्टम ह्याक गर्ने हो र ? यसबाट आतंकित हुनु पर्दैन’।
भाइबरमा आएको मेसेजमा राष्ट्र बैंकसहित १५ बैंकको सिष्टम २४ घन्टाभित्र ह्याक गर्ने धम्की थियो।
