काठमाडौँ । नेपाली कांग्रेसका सभापति शेरबहादुर देउवालाई प्रधानमन्त्रीमा विश्वासको मत दिने नेता माधवकुमार नेपालसहित २२ सांसदलाई सोधिएको स्पष्टीकरणको समयसीमा आज सकिँदै छ ।
यसअघि २२ सांसदलाई २४ घण्टे स्पष्टीकरण सोधिएको र जवाफ आएपछि कारबाहीबारे निर्णय हुने बताइएको थियो । बैठकमा प्रधानमन्त्री देउवालाई विश्वासको मत दिने नेताहरूलाई साधारण सदस्यता समेत नरहने गरी पार्टीबाट निष्कासन हुन सक्ने बताइएको छ ।
एमाले केन्द्रीय कमिटीको बैठक ४ गतेदेखि जारी छ । ललितपुरस्थित च्यासलमा रहेको तुलसीलाल स्मृति प्रतिष्ठानमा जारी १०औँ केन्द्रीय कमिटी बैठकले विभिन्न समसामयिक राजनीतिक विषयमा छलफल गरिरहेको छ । यसअघिको बैठकमा पार्टी अध्यक्ष केपी शर्मा ओलीले असन्तुष्ट पक्षलाई एकतामा आउन समेत आग्रह गरेका छन् ।
यता माधव नेपाल पक्षका सांसदले भने स्पष्टीकरणको जवाफ नदिने बताइसकेका छन् । नेपाल पक्षका नेताले स्पष्टीकरणको औचित्य नरहेको बताउँदै यस्ता गतिविधिले आन्तरिक विवाद समाधान हुनुको साटो झनै विवाद बढाउने बताउँदै आएका छन् ।।
यस्तै स्पष्टिकरण बारे जानकारी लिन नेपाल पक्षका नेताहरुले कानून व्यवसायीहरुसँग परामर्श समेत गर्दै छन् ।
