काठमाडौं । स्वास्थ्य तथा जनसंख्या मन्त्रालयले एक सातायता कोभिड-१९ संक्रमणदर पहिलाभन्दा बढेको भन्दै सतर्कता अपनाउन आग्रह गरेको छ ।
बिहीबार विज्ञप्ति जारी गर्दै मन्त्रालयले संक्रमणको बढ्दो अवस्थाले चुनौतीपूर्ण अवस्था आउन सक्ने भन्दै अस्पतालका अक्सिजन‚ शय्यालगायतका पूर्वाधार तथा सेवाहरू तयारी अवस्थामा राख्नसमेत आग्रह गरेको छ ।
‘संक्रमणको जोखिम बढिरहेको अवस्थामा संक्रमण रोकथाम तथा नियन्त्रणका लागि प्रभावकारी भूमिका बढाउन संवेदनशील भई जिम्मेवार बनी जनस्वास्थ्यको मापदण्डहरूको पालना गर्न/गराउन स्वास्थ्य तथा जनसंख्या मन्त्रालय सम्बन्धित सबैमा हार्दिक अनुरोध गर्दछ‚’ विज्ञप्तिमा भनिएको छ‚ ‘संक्रमणको बढ्दो अवस्थाले चुनौतीपूर्ण तेस्रो लहर आउन सक्ने तर्फ मध्यनजर गर्दै सबै स्वास्थ्य संस्थाहरूको अक्सिजन‚ शय्यालगायतका पूर्वाधारहरू तथा सेवाहरू चुस्तदुरुस्त राख्नहुन अनुरोधसमेत छ ।’
हाल निषेधाज्ञा खुकुलो भएको अवस्थामा पनि मानिसहरू बुझी/नबुझी, लुकीछिपी वा खुलमखुल्ला जनस्वास्थ्यका मापदण्डको उल्लंघन गरिरहेको देखिएकाले एक सातायता संक्रमणदर बढ्दो अवस्थामा रहेको मन्त्रालयले जनाएको छ ।
