साझा न्यूज । बुटवल
नेपाली कांग्रेसको आसन्न १४ औं महाअधिवेशनमा लुम्विनी प्रदेश समितिको सभापति पदमा नेपाली कांग्रेसका नेता विरेन्द्र कुमार कनौडियाले उम्मेदवारी घोषणा गरेका छन् । नेता कनौडियाले आफ्नो उम्मेदवारी सामाजिक संजाल फेसबुक मार्फत सार्वजनिक गरेका हुन् । नेता कनौडिया कपिलवस्तु जिल्ला निर्वाचन क्षेत्र नं. ३ ख का प्रदेश सभा सदस्य हुन् । उनी लुम्विनी प्रदेश सरकारमा प्रमुख विपक्षी दलका नेता समेत हुन् ।
२०३६ सालमा पंचायत शासन विरुद्ध नेपाली कांग्रेसले आह्वान गरेको जनमत संग्रहमा नेपाली कांग्रेसको तर्फबाट आफ्नो भूमिका निर्वाह गरेका नेता कनौडिया जिल्लाकै पुराना कांग्रेसी नेताहरु मध्येका नेता हुन् । उनले जिल्ला विकास समिति कपिलवस्तुको उपसभापति, नेपाल सरकारको जलस्रोत राज्यमन्त्री समेतको जिम्मेवारी निभाई सकेका छन् ।
केन्द्र भन्दा प्रदेशमै रहेर नेपाली कांग्रेसको संगठनलाई लुम्विनी प्रदेश भरी थप क्रियाशील बनाउने आफ्नो अपेक्षा भएका कारण लुम्विनी प्रदेश समितिको सभापति पदमा उम्मेदवारी दिने घोषणा गरेको नेता कनौडियाले साझा न्यूजलाई बताए ।
लुम्विनी प्रदेश सरकारमा प्रमुख प्रतिपक्षको रुपमा रहेको नेपाली कांग्रेसका तर्फबाट आफुले बलियो प्रतिपक्षको भूमिका निर्वाह गर्दै आएको बताउंदै नेता कनौडियाले अब आफु पार्टी संगठनको नेतृत्वमा रही काम गर्न ईच्छुक रहेको बताए । लुम्विनी प्रदेशका १२ जिल्लाका नेपाली कांग्रेसका पुराना नयां सवै नेता कार्यकर्ताहरुसंगको सम्पर्क, समन्वय एवं विश्वासबाट आफु अघि बढ्ने उनले बताए ।
आफुलाई लुम्विनी प्रदेशका नेता कार्यकर्ताहरुको सहयोग मिल्ने र यस पटकको अधिवेशनबाट आफु प्रदेश सभापतिको रुपमा जिम्मेवारी पाउने पूर्ण आशामा रहेको उनले बताए । नेता कनौडिया लुम्विनी प्रदेशमा नेपाली कांग्रेसका तर्फबाट मुख्यमन्त्री समेतका उम्मेदवार हुन् ।
