कपिलवस्तु जिल्लाको सदरमकाम तौलिहवाबाट प्रकाशन शुरु गरिएको साझा न्यूज पत्रिका आफ्नो प्रकाशनको १२ वर्षमा प्रवेश गरेको छ । विकासका लागि संचार अभियान भन्ने नारा बोकेर आम पाठक माझ आएको यस पत्रिकाले नेपाल सरकारबाट प्रदेश स्तरीय साप्ताहिक पत्रिकाको रुपमा मान्यता पाई प्रकाशन शुरुका वर्षहरुबाटै वर्गीकरणमा परेको छ ।
साझा न्यूजको यो साझा यात्रामा आईपुग्दा सम्म सहयोग गर्नुहुने आमपाठक , विज्ञापनदाता तथा सम्पादक तथा रिर्पोटरहरुको निकै महत्वपूर्ण भूमिका रहेको छ । तसर्थ पनि १२ औं वर्ष प्रवेशको यस घडीमा सवैमा हार्दिक आभार व्यक्त गर्न चाहन्छौं । यस सुखद घडीमा आगामी दिनहरुमा पनि यस्तो सहयोग र शुभेच्छाको अपेक्षा पनि गरेका छौं ।
पछिल्ला वर्षहरुमा संचार क्षेत्रमा आएको अनलाईन संस्करणको लोकप्रियता प्रतिध्यान दिदै हामीले पनि साझा न्यूज पत्रिकालाई अनलाईन संस्करण esjhanews.com मार्फत आम पाठकहरुमा माझ ल्याउन सफल भएका छौं । सूचना विभागमा दर्ता गरी प्रेस काउन्सिलमा सुचीकृत भई esjhanews.com अनलाईन संस्करणलाई पनि हामीले साझा न्यूज पत्रिका संग संगै अघि बढाएका छौं ।
गाउँ घरका स-साना खबरहरु जसले प्रदेश तथा केन्द्रका मिडियाहरुमा स्थान पाउन सक्दैनन् त्यस्ता खबरहरुलाई हामी प्राथमिकताका साथ साझा न्यूज पत्रिका र अनलाईन मार्फत् उठान गरेका छौं ।
हरेक टोलवस्तीमा साझा न्यूजका खबरबाहकहरु स्थापित गरी स-साना खबरहरुलाई समेट्ने अभियानमा हामी जुटेका छौं । साझा न्यूज पत्रिकालाई सवैको साझा पत्रिकाको रुपमा परिस्कृत गरी अघि बढाउने योजनाका साथ हामी अघि बढेका छौं ।
साझा न्यूजमा कुनै पनि र राजनैतिक गन्ध आउन नदिन भरपुर कोशिश गरेका छौं । सवै राजनैतिक दलका समाचार हाम्रा लागि प्राथमिकताको विषय हो । हाम्रा समाचारहरुमा कहि कतै राजनैतिक पुर्वाग्रह नहोस् भन्ने हाम्रो चाहना छ । तसर्थ पनि साझा न्यूज पत्रिकाले सबैको साझा पत्रिकाका रुपमा माया पाएको छ ।
पछिल्लो २ वर्ष कोभिड संक्रमणका कारण पत्रिका पनि निकै आर्थिक संकटग्रस्त अवस्थाबाट गुजिएको छ । पछिल्ला केही वर्षहरुमा रंगीन पत्रिकाको रुपमा साझा न्यूजलाई प्रकाशन गर्दै आए पनि कोभिड संक्रमण र त्यसको असर विज्ञापन क्षेत्रमा परेका कारण पत्रिकाको विज्ञापन व्यवसाय निकै न्यून हुन पुग्यो । त्यस कारण पनि हामी रंगीन पत्रिकालाई कालो पत्रिकामा झार्न बाध्य भयौं । तर पनि हामीलाई हाम्रा आम पाठक तथा समस्त शुभेच्छुकहरुको ठुलो सहयोग रहदै आएको छ ।
आगामी दिनमा साझा न्यूजको यो यात्रालाई यहांहरुको अमूल्य सल्लाह , सुझाव तथा सहयोगबाट थप परिस्कृत हुदै अघि बढ्ने प्रण गरेका छौं ।
