काठमाडौं । नेकपा एमालेका वरिष्ठ नेता माधवकुमार नेपाल पक्षको केन्द्रीय कमिटीको आजको बैठक सकिएको छ।
आजको बैठकमा नेता नेपालसहित विजय पौडेल, झपट रावल, रामकुमारी झाँक्री, सावित्रा भुसाल, निरा जैरु, ठाकुर गैरे र भानुभक्त जोशी लगायतले बोलेका थिए।
बैठकमा ७३ जना केन्द्रीय सदस्य उपस्थित भएर हस्ताक्षर गरेको एक नेताले जानकारी दिए। बैठकमा प्रत्येक सदस्यलाई तीन मिनेट समय उपलब्ध गराइएको थियो।
पार्टी एकताको सम्भावना क्षीण हुँदै गएको अवस्थामा आफू पक्षका नेताहरूको धारणा बुझ्नका लागि नेता नेपालले केन्द्रीय कमिटी बैठक आयोजना गरेका हुन्। आजको केन्द्रीय कमिटी बैठकअघि स्थायी कमिटीको बैठक बसेको थियो।
आजको बैठकमा नेता माधव कुमार नेपालले केहीबेर सम्बोधन गरेका थिए । उनले सम्मानजनक हैसिततमा मात्र पार्टी एकता हुन सक्ने तर आत्मसमर्पण गर्न नसकिने बताए ।
बैठक भोलि बिहान साढे ११ बजे पुनः बस्ने नेता रघुजी पन्तले जानकारी दिए।
यस्तै बैठकले अधिवेशन प्रक्रिया रोक्न माग गरेको छ । बैठकलाई सम्बोधन गर्दै वरिष्ठ नेता माधवकुमार नेपालले पार्टी एकता नै आफ्नो इच्छा र चाहना भएको बताएका छन् ।
नेता रघुजी पन्तका अनुसार १० बुँदे सहमति जुटाउने कार्यदलका संयोजक भीम रावलले सदस्यता नवीकरण र वडा तथा नगर कमिटीको अधिवेशन रोक्न ओली पक्षको कार्यदलका सदस्यहरुलाई भनेका छन् । १० बुँदे सहमति अनुसार २ जेठ २०७५ को कमिटी बसेर मात्र अरु प्रक्रिया थाल्नुपर्ने नेपाल समूहको माग छ ।
