–जापान प्रतिनिधि
अगष्ट १२ तारिख जापानमा एकैदिन १८,८२२ जना ब्यक्ति कोरोना भाइरसबाट बिरामी भएका छन । जापानमा कोभिड -१९ संक्रमणको संक्रामक प्रकार डबल म्युटेन्ट भाइरस फैलंदो क्रममा रहँदा अवस्था थप बिग्रने क्रममा एकैदिन संक्रमितको सर्वाधिक संख्या पुष्टिको नयाँ रकेर्ड बनेको हो । बिहीवार एकैदिन जापानमा अहिलेसम्मकै धेरै कोरोनाका बिरामी पुष्टि भएको स्वास्थ्य मन्त्रालयले बताएको छ ।
स्वास्थ्य मन्त्रालयका अनुसार बिहिबार सम्म जापानमा कोरोना संक्रमण भएकाको संख्या १० लाख ९ ० हजार २ सय ३७ पुगेको छ । कुल संक्रमित मध्ये हालसम्म ९ लाख ५ हजार व्यक्ति निको भइसकेको स्वास्थ्य मन्त्रालयको विवरणमा उल्लेख छ ।
यसै बिच जापान स्थित नेपाली दुतावासले सुचना प्रकाशित गरि नयाँ भेरियन्ट सहितको कोभिड -१९ को संक्रमण जापानमा तीब्र रुपमा फैलिरहेको व्यहोरा जानकारी गराउदै यस महामारीबाट जोगिनका लागि अनावश्यक भीडभाडबाट टाढा रहने , घर बाहिर निस्कँदा अनिवार्य रुपमा मास्कको प्रयोग गर्ने लगायत सुरक्षा सतर्कताका सम्पूर्ण उपायहरूको पूर्ण पालना गर्नु / गराउनुहुन सम्पूर्ण जापानवासी नेपाली दिदीबहिनी तथा दाजुभाइहरूमा राजदूतावास हार्दिक अनुरोध गरेको छ।
यसै सन्दर्भमा टोकियो र नागोया लगायतका स्थानहरूमा नेपाली नागरिकहरूबाट सञ्चालित केही रेष्टुरेन्टहरूमा नेपाली नागरिकहरू जमघट हुँदा मास्क नलगाउने , पेय पदार्थ सेवन गर्ने र नाचगान गर्ने जस्ता कार्यहरू भएको भन्दै सजग गराइदिन जापानको परराष्ट्र मन्त्रालयबाट समेत अनुरोध भई आएको हुदा सचेत हुन आग्रह पनि गरिएको छ ।
