दाङ। बाढीले कार बगाउँदा दाङमा चार जनाको मृत्यु भएको छ । घोराही लमही सडक खण्डको घोराही उपमहानगरपालिका ४ सिस्नेखोलामा आएको बाढीले कार बगाएको थियो । घटनामा एकै घरका दुई दिदि बहिनीसहित चारजनाको मृत्यु भएको प्रहरीले जनाएको छ । कारका चालकको भने प्रहरीले उद्धार गरेको छ ।
घटनामा परि घोराही-१३ की ३२ वर्षीया सुशीला श्रेष्ठ, घोराही १४ की ३० वर्षीया राधा श्रेष्ठ कुवर, घोराही-१३ की ४० वर्षीया रितामाया पुन र घोराही-१४ का ४२ वर्षीया विमला केसीको मृत्यु भएको जिल्ला प्रहरी कार्यालय दाङका प्रहरी प्रवक्ता डीएसपी मुकुन्दप्रसाद रिजालले जानकारी दिए । उनका अनुसार प्रदेश ०३-०१-०२४ च ४४४० नम्बरको कार भारतको रुपैडियाबाट घोराहीतर्फ फर्कदैं गरेको अवस्थामा बाढीले बगाएको हो । चालक घोराही–१५ का ४० वर्षीय नरबहादुर पुनको खुट्टा भाँचिएको र राप्ती स्वास्थ्य विज्ञान प्रतिष्ठानमा उपचार भैरहेको प्रहीले जनाएको छ ।
मृतक चारै जनाको शब पोस्टमार्टमका लागि राप्ती स्वास्थ्य विज्ञान प्रतिष्ठानमा राखिएको छ ।
