काठमाडौं । नेपालको पुरुष टोलीले एसियन सिनियर सेन्ट्रल जोन पुरुष तथा महिला भलिबल च्यालेन्ज कपमा पहिलो जित हात पारेको छ ।
बंगलादेशको ढाकामा शुक्रबार उज्वेकिस्तानलाई ३–१ को सेटमा हराउँदै नेपालले पहिलो जित हात पार्न सफल भएको हो ।
बलियो टिम उज्वेकिस्तानविरुद्ध नेपालले पुनरागमन गर्दै उत्कृष्ट जित निकालेको हो ।
रोमान्चक खेलको पहिलो सेट नेपालले २५–१८ ले गुमाएको थियो । तर, त्यसपछिको तीन सेट नेपालले लगातार जित्यो ।
नेपालले दोस्रो सेट २५–२१, तेस्रो सेट २५–२१ र चौथो सेट २५–२३ ले आफ्नो पक्षमा पार्दै पहिलो जित निकालेको हो ।
खेलमा नेपालका धन बहादुर प्लेयर अफ दि म्याच चुनिए ।
यसअघि बिहीबार भएको पहिलो खेलमा नेपाल आयोजक बंगलादेशसँग ३–० को सोझो सेटमै पराजित भएको थियो ।
अब नेपालले तेस्रो खेलमा आज श्रीलंका र अन्तिम खेलमा आइतबार माल्दिभ्सको सामना गर्नेछ ।
पुरुषतर्फ ५ टिमको सहभागिता रहेको छ । राउण्ड रोबिनको आधारमा खेलाइने प्रतियोगिताको शीर्ष दुई टोलीले फाइनलमा प्रतिस्पर्धा गर्ने छन् ।
त्यस्तै तेस्रो र चौथो टोलीले तेस्रो स्थानको लागि प्रतिस्पर्धा गर्ने छन् ।
त्यसैगरी महिलातर्फ नेपालले लगातार दोस्रो जित निकालेको छ ।
शुक्रबार नेपालले माल्दिभ्सलाई ३–० को सेटमा हराएर लगातार दोस्रो जित निकालेको हो ।
महिलाको पहिलो खेलमा नेपालले श्रीलंकालाई ३–२ को सेटमा हराएको थियो ।
