काठमाडौं- पाकिस्तानमा हिमपातका कारण २१ जनाको मृत्यु भएको छ। राहत तथा उद्धार अधिकारीहरुका अनुसार मुरी र पञ्जाब प्रान्तमा २१ जनाको मृत्यु भएको हो।
मारी हिल स्टेशनलाई पहाडको रानी भनिन्छ र हिउँदमा ठूलो संख्यामा पर्यटकहरू आउँछन्। यहाँ परेको हिमपातका कारण सडकमा सवारी साधनहरु अवरुद्ध भएका छन् भने हजारौं पर्यटक चिसोमा सडकमै रात बिताउन बाध्य भएका छन् ।
अहिले यस क्षेत्रमा पर्यटकको प्रवेशमा रोक लगाइएको छ । सरकारले इस्लामाबाद–मारी राष्ट्रिय राजमार्ग बन्द गरेको छ। यस्तै, मुरी र वरपरका जिल्लाहरूमा आपतकालीन अवस्था लागू गरेको छ।
प्रशासनलाई राहत र उद्धार कार्यमा सेना र अर्धसैनिक बलको सहयोग गरिरहेका छन्। पाकिस्तानका आन्तरिक मन्त्री शेख रशिदले १५/२० वर्षपछि यति ठूलो संख्यामा पर्यटक गएका कारण अप्ठ्यारो अवस्था सिर्जना भएको बताए।
‘हामीले त्यहाँ जाने सबै बाटोमा प्रतिबन्ध लगाउनुपर्ने अवस्था छ। त्यहाँ सडकमा हजारौं सवारी साधन अड्किएका छन्, हामी तिनीहरूलाई बाहिर निकाल्ने प्रयास गरिरहेका छौं,’ उनले भने,‘अहिले राशन र राहत कार्यका लागि अत्यावश्यक वस्तु बोकेका सवारीसाधनलाई मात्र त्यहाँ जान अनुमति दिइएको छ।’
भोलि साँझसम्म सडक बन्द रहने उनले जानकारी दिए।एजेन्सी
