–प्रिन्स मिश्रा, बहादुरगंज (कपिलवस्तु)
कपिलवस्तु स्थित शिवराज अस्पतालको भवन निर्माणमा चरम लापरवाही भएको पाइएको छ । कृष्णनगर नगरपालिकाको वडा नम्बर-९, बहादुरगञ्जमा रहेको शिवराज अस्पतालको नवनिर्मित भवनको छतबाट पानी चुहिएको छ ।
अस्पताल भवन निर्माणमा गुणस्तरहीन सामग्रीको प्रयोगले ढलान गरिएको एक महिना नबित्दै छतबाट पानी चुहिन थालेको हो ।
भवन निर्माणको जिम्मा पाएको ब्रेभ कन्ट्रक्शन भैरहवाले छत ढलान लगायतका निर्माणको काममा मापदण्ड अनुरुप काम नगरेकोले चुहिएको स्रोतको दावी छ ।
कृष्णनगर नगरपालिकाका इन्जिनियर प्रदीप चौधरीले संघीय सरकारको १ करोड ७३ लाखको लगानीमा २ वर्षमा भवन निर्माण गरिएको बताए ।
इन्जिनियर चौधरीले छत ढलान गर्दा स्वयम आफै र असिस्टेंट इन्जिनीयर मनोज शाक्यको निगरानीमा छत ढलान गरिएको जनाए ।
ढलान गर्ने समयमा प्रयोग हुने भाइब्रेटर मेशिन राम्रोसँग प्रयोग नभएको र लेबरहरुको लापरवाहीका कारणले ढलान भएको छतबाट पानी चुहिएको हुन सक्ने बताए ।
ढलान भएको छतको ठाउँठाउँमा चुहिने (लिकेज)लाई बन्द गर्नको ढलान भएको छत माथि चिपिङ्ग गरि पुनः २ इन्च मोटो ढलान गर्ने गरिएको उनले जनाए ।
यता भवन निर्माण ठेक्का पाएको निर्माण कम्पनी ब्रेभ कन्ट्रक्शन भैरहवाका अमित श्रीवास्तवले भवनको डिजाइन र इस्टिमेट अनुसार नै सामग्री प्रयोग गरि निर्माण गरिएको बताए ।
भवन निर्माण गर्दा नगरपालिकाका प्राविधिकको उपस्थिति र प्राविधिककै सल्लाह-सुझाव अनुसार नै भवन निर्माणको सम्पूर्ण काम भएको उनको भनाइ छ ।
यसरी महिनादिनमै भवन चुहिनुमा कस्को गल्ती हो तुरन्त पत्ता लगाई कारवाहि गर्नु पर्ने स्थानियको माग छ।
