- आरपी उपाध्याय, नवलपरासी
पश्चिम नवलपरासी सरावल गाउँपालिकाअन्तर्गत हरियाली सामुदायिक वनबाट अवैध रुपमा काठ काटी लैजाँदै गरेको अवस्थामा काठ लैजाने व्यक्तिसहित ठूलो परिमाणको काठ प्रहरीले नियन्त्रणमा लिएको छ।
सरावल गाउँपालिकाअन्तर्गत रहेको हरियाली सामुदायिक वनबाट १९ गोलिया, १३७.५१ क्युफिट सिसौ काठ लु. १ च ७२८२ नम्बरको पिकअप गाडीमा लोड गरि लैजाँदै गरेको अवस्थामा नियन्त्रणमा लिइएको जिल्ला प्रहरी कार्यालय पश्चिम नवलपरासीका सूचना अधिकारी एवम् डिएसपी भोजराज पाण्डेले जानकारी दिनुभएको छ । सामुदायिक वनबाट अवैध रुपमा काठ कटान गरि लैजाँदै गरेको अवस्थामा गोप्य सूचनाको आधारले प्रहरीचौकी बासाका प्रहरी सहायक निरीक्षक यादव न्यौपानेको कमान्डमा खटेको उपभोक्ता समितिको प्रतिनिधिसहितको संयुक्त टोलिले नियन्त्रणमा लिएर थप कारवाहीको लागि सवडिभिजन वन कार्यालय बर्दघाटमा बुझाइएको जानकारी गराइएको छ।
सरावल १ हरियाली सामुदायिक वनबाट यसपुर्व पनि अवैध रुपमा काठको तस्करी हुँदै आएकोमा प्रहरीको गोप्य निगरानीले व्यक्ति सहित काठ नियन्त्रणमा लिएको बताइएको छ।
