तौलिहवा, माघ २ गते । थारु समुदायको राष्ट्रिय पर्व माघी महोतसव २०७९ तथा नयाँ वर्षको अवसरमा आजदेखि कपिलबस्तु नगरपालिका ६ सगरहवा लगायत जिल्लाको बुद्धभुमि, शिवराज र बाणगंगामा महोत्सव आयोजना गरिएको छ । थारु समुदायले माघीलाई विशेष पर्वको रुपमा लिने गर्दछन । माघीकै अवसरमा अर्थात माघे संक्रान्तिको दिनमा थारु समुदायमा महत्वपूर्ण निर्णय गर्ने गरिन्छ ।
थारु कलासंस्कृतिको जर्गेना गर्ने उद्देश्यले सगरहवाा मा २ दिने दोश्रो थारु माघी महोत्सव आयोजना गरिएको हो । दुई दिन सम्म चल्ने महोत्सवमा महिला र पुरुषहरू आ आफ्नो भेषभुषामा सजिएर आएका थिए । पुरुष भन्दा महिलाहरु आफ्नो छुट्टै पहिचान बोकेर आएका कारण सबैको आकर्षणको केन्द्र बनेका थिए । महिलाहरु लेहंगा चोली लगाई ओढनी ओढेर अरिया लगाएर थिए ।
त्यस्तै उनीहरुले घाटीमा हसुली, कम्मरमा कर्धन लगाई खुट्टामा कढा लगाएका थिए । कानमा झुम्का र नाकमा नथुनीले पनि उनीहरूको कला संस्कृति झल्कन्थ्यो । यस्तै अन्य कतिपय थारु महिलाहरु छैकल, बाजु, बहु महुची र माला लगायतका गर गहनामा सजिएर आएका थिए ।
यस्तै आधुनिक जिन्स पाइन्टमा देखिने पुरुषहरू पनि थारु भेषभुषामा सजिएर आएका थिए । उनीहरुले धोती जामा लगाई बाहिर कट आसकोटमा पगडी र भेगाई लगाएर आएका थिए । नाच र गानमा उनीहरुले बिभिन्न विषय उठान गरेका थिए । माघी महोत्सवमा आमन्त्रितलाई थारुहरूको खानाको विशेष परिकारहरु पनि प्रदर्शनमा राखिएको थियो ।
महोत्सवमा लोप हुन लागेका झुमरा नाँच, मयूर नाँच, लठी नाँच, झररा लगायतको कलाको संरक्षण गर्न महोत्सव आयोजना गरिएको कार्यक्रमका सह संयोजक सोहन थारुले बताउनुभयो ।
महोत्सवमा प्रस्तुत गरिएको थारु कला संस्कृति बारे आरु समुदायलाई जानकारी मिल्ने कपिलबस्तु नगरपालिकाका नगर प्रमुख सुदिप पौडेलले बताउनुभयो । पर्वले एक आपसमा सद्भाव कायम राख्ने उहाँले बताउनुभयो । उहाँले भन्नुभयो “तपाईहरुको हरेक क्रियाकलपमा नगरपालिका सधै तत्पर रहेको बताउनुभयो ।” कार्यक्रम सगरहवा गाँउ समाजको आयोजनामा हुन लागेको छ ।
कार्यक्रममा कपिलबस्तु नगरपालिका वडा नं। ६ का वडाध्यक्ष रामजित कुर्मी, वडा सचिव गौतम शाक्य लगायतले शुभकामना मन्तव्य राखेका थिए ।
