सिद्धार्थनगर, चैत १५ गते । नेकपा (एमाले) का अध्यक्ष तथा पूर्व प्रधानमन्त्री केपी शर्मा ओलीले टेलिभिजनलाई समयानुकुल प्रविधियुक्त बनाएर सेवाग्रहीका लागि सहज र सरल बनाउनुपर्ने बताउनुभएको छ ।
टेलिभिजनबाट नै अन्य सामाजिक सञ्जाल युट्युव, टिकटक, फेसबुकलगायतले समेत सूचना प्राप्त गर्ने हुनाले यसलाई प्रविधियुक्त बनाउन उहाँले सुझाव दिनुभएको हो । विकासका लागि सुचना तथा सञ्चार अभियान (इम्मोड) नेपाल लुम्बिनी सामुदायिक टेलिभिजनको १७ औँ बार्षिक साधारणसभा तथा सातौँ अधिवेशनलाई रुपन्देहीको बुटवलमा आज सम्बोधन गर्दै उहाँले सो कुरा बताउनुभयो ।
नेपालका टेलिभिजनलाई बदलिदो टेक्निोलोजीसहित समयानुकुल ढंगले चलाउन सक्नुपर्छ उहाँले भन्नुभयो । संसारमा सबै प्रकारका टेक्नोलोजी उपलब्ध रहेको भन्दै दुनियामा सञ्चारका प्रबिधिहरु अत्यन्तै तिब्रताका साथ अघि बढेको उहाँको भनाइ छ । आइटी टेक्नोलोजी, आर्टिफिसियल इन्टेलिजेन्सलाई बढाउन जरुरी रहेको उहाँले चर्चा गर्नुभयो ।
उहाँले भन्नुभयो, “नयाँ टेक्निोलोजीले राम्रो काम गर्छ बेनिफीट दिन्छ, त्यसैले यसलाई प्रयोगमा ल्याउनुपर्छ, लगानी बढाउनुपर्छ ।” म त टेलिभिजन खोल्न र बन्द गर्न मात्रै जानेको मान्छे हुँ भन्दै अध्यक्ष ओलीले भन्नुभयो, “कम्पनीले टीभी बनाउँछ, मिस्त्रीले जोडजाड पार्छ, रिमोट हातमा दिन्छ, हामी त च्यानल चेन्सवाला मात्र हौँ ।”
गुल्मी, पाल्पा र अर्घाखाँचीमा मिसन ग्रासरुट सकेर अध्यक्ष ओली बुटवल आइपुग्नुभएको छ । आजै उहाँले यहाँको कार्यक्रममा सम्बोधन गर्ने कार्यक्रम रहेको सो दलले जनाएको छ ।