काठमाडौँ । भौतिक पूर्वाधार तथा यातायात राज्यमन्त्री नन्दा चपाईंले सडक निर्माणमा वन बाधक बनेको बताएकी छन् ।
मङ्गलवार काठमाडौँमा स्पिकर फोरम नेपाल र मिडिया एण्ड कन्टेम्पोररी डेभलपमण्ट फाउण्डेशनले आयोजना गरेको जलवायु परिवर्तनसम्बन्धी नीतिगत बहस कार्यक्रममा बोल्दै उनले सहज रूपमा सडक निर्माणका लागि कानुन परिमार्जन गर्न जरुरी भएको बताएकी हुन् ।
जलवायु परिवर्तनमा आउने रकमको सही सदुपयोग भएको छ वा छैन भन्नेबारेमा निरीक्षण हुनु पर्ने उनको भनाइ छ । मन्त्री चपाईंले हरेक स्थानमा भइरहेको प्रदूषणको समाधान नहुँदा पहाडी र हिमाली क्षेत्रका बासिन्दाहरूले दुःख पाइरहेको जिकिर गरिन् ।
उनले वन र सडकको तादम्यता नमिल्दा सडक निर्माण हुन नसकेको गुनासो आइरहेको र जलवायु परिवर्तनको पहाडी क्षेत्रमा धेरै असर पर्ने उनको भनाइ छ । उनले स्थानीय तहलाई यसको पूर्ण जिम्मेवारी दिएर अघि बढ्नु पर्ने बताइन।