कालीकोट, जेठ ९ गते । जिल्लाको खुलालु पुल नजिकै रहेको डर लाग्दो खाल्डो दुर्घटना हुन नदिन अल्पकालिन पिसिसि गरी सडक निर्माण गरिएको छ । कर्णाली करिडोरको खुलालु पुलको बायाँ पट्टीको जोखिम सडकलाई पिसिसि गरेर जोखिम न्युनिकरण गरिएको हो ।
करिडोरको खुलालु सल्लीसल्ला सडक आयोजनाको प्रवेश द्वार कर्णाली पुलको ओरालोमा खाली गाडी चल्न समेत कठिन छ । उक्त क्षेत्र मर्मतका लागि सडक विभागले ठेक्का खोलेपनि कुनैपनि निमार्ण व्यवसायीले काम गर्न इच्छा नदेखाएको कारण यो वर्षातको समयमा काम गर्नका ठुला दुई वटा खाल्डाहरुमा ढुङ्गा सोलिङ गरी कन्क्रिट ढलान गरेर अल्पकालीन रुपमा समस्याको समाधान गरिएको छ । उक्त खाल्डोमा फोरविईल गाडी कठिन रुपमा चढ्ने गरेका थिए । पुल छेउमा जोखिम सडकका बारेमा जिल्लावासीले बारम्बार मर्मत गर्न सरोकारवालाहरुलाई आग्रह गदै आएका थिए ।
सडक डिभिजन कार्यालय जुम्लाका प्रमुख दिपेन्द्र विष्टले नागरिकको चर्को गुनासोलाई तत्कालका लागि जोखिम ठाउँमा पिसिसि गरेर अल्पकालीन समस्या टारेको बताउनुभयो । उहाँले आगामी आर्थिक वर्षमा ठुलो ठेक्का लगाएर उक्त क्षेत्र सुधार गरिने बताउनुभयो ।
कालीकोटका प्रमुख जिल्ला अधिकारी जोरासिंह माझीले वर्षातको समयमा झनै कठिन हुने भएकाले केहीदिन करिडोर बन्द गरेर भएपनि जोखिम ठाउँलाई सुधार गरिएको बताउनुभयो । प्रमुख जिल्ला अधिकारी माझीले समयसमयमा गरेको आग्रहलाई सडक डिभिजन कार्यालय जुम्लाले बल्ल सुनुवाई गरेर केही हदसम्म सुधार गरेकोमा खुशी व्यक्त गर्नुभयो । उक्त खण्ड सुधारका लागि वैशाख ३१ गते बाट एक हप्ताका लागि करिडोरको खुलालु खण्ड बन्द गरिएको थियो ।
निमार्ण व्यवसायी मानव बमले उक्त सडक सुधारका लागि धेरै पटक सडक डिभिजन कार्यालय जुम्लालाई ताकेता गरेको सुनाउनुभयो । सडक मर्मतका लागि गत वैशाख ३१ गतेदेखि बन्द गरिएको कर्णाली करिडोर जेठ १० गते आर्थात् आजैबाट आम्सिक रुपमा खुल्ने भएको छ ।
प्रमुख जिल्ला अधिकारी जोरासिहं माझिले सडक कार्यालय प्रमुखसँगको कुराकानीपछि मोटरसाईकल र साना गाडी पिसिसि गरेको सडकमा चलाउँदा फरक नपर्ने भएपनि दश गतेबाट आम्सिक रुपमा खुलाउने जानकारी दिनुभयो ।
