काठमाडौं, असार १७ गते । आम जनता पार्टीका अध्यक्ष एवं पूर्वमन्त्री प्रभु साहले केही मुठीभर सम्भ्रान्त मानिसले मात्रै बैंकबाट ऋण पाउने अवस्थाको अन्त्य हुनेगरी कानुन निर्माण गर्न सरकारसँग माग गर्नुभएको छ । आम जनता बैंकहरुबाट ऋण नपाएपछि मिटरव्याजीको मारमा परेर आत्महत्या समेत गर्न बाध्य भएको उहाँले चर्चा गर्नुभयो ।
सरकारले आम जनतालाई बैंकबाट ऋण लिने व्यवस्था गर्नुपर्ने उहाँको सुझाव छ । आईतबार प्रतिनिधिसभाको दोस्रो बैठकमा ‘मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८०’ माथिको सैद्धान्तिक छलफलमा भाग लिँदै अध्यक्ष साहले भन्नुभयो, ‘मान्छे बैंकबाट ऋण लिन नपाएर ठगिन विवश भएका छन्, गरिवले पनि बैंकहरुबाट ऋण लिन पाउने अधिकारको उपयोग गर्ने वातावरण बनाइनुपर्छ ।’
गरिव जनताबाट निक्षेप संकलन हुने तर केही मुठीभर मानिसले मात्रै ऋण पाउने अवस्थाको अन्त्य नभएसम्म मुलुकमा समृद्धि सम्भव नरहेको पनि उहाँले बताउनुभयो । अध्यक्ष साहले भन्नुभयो, ‘देशको पूँजी सही ढंगले परिचालन नभई मुलुकको समृद्धि सम्भव छैन । मान्छे जानीजानी ठगिन बाध्य छन् ।’ बैंंकले ऋण नदिने भएकाले मानिस जानी–जानी धेरै ब्याज तिरेर व्यक्तिसँग ऋण लिन बाध्य भइरहेको उहाँले चर्चा गर्नुभयो । अध्यक्ष साहले निक्षेप संकलन भएकाले बैंकहरु खुशी भए पनि ऋण नपाउँदा गरिव जनता मारमा परिरहेको पनि स्मरण उहाँले गराउनुभयो ।
