साझा न्यूज । कपिलवस्तु
लुम्विनी प्रदेशका तराई मधेशका जिल्लाहरुमा आज महिलाहरुले खुशीयालीका साथ त्रिछठ्ठी पर्व मनाएका छन् । आफ्नो छोराको दिर्घायु तथा सुस्वास्थ्यको कामना गर्दै मधेशी समुदायका महिलाहरुले यो पर्व मनाएका हुन् ।
पर्वमा महिलाहरुले विहान सवेरै उठेर स्नान गरी कुश र वरियाराको पुजा गरेका छन् । महुवाको पात छठ्ठी मातालाई चढाउने र हांगाको दतिवन गरेका छन् ।
कसैले घर किनारको चौरमा त कसैले देवी स्थानमा बसेर यो पुजा गरेका छन् । पर्वको अवसरमा कपिलवस्तु नगरपालिकाका नगर प्रमुख सुदीप पौडेलले सम्पूर्ण महिलाहरुमा शुभकामना व्यक्त गरेका छन् ।
पुजा सकिए लगत्तै महिलाहरुले त्रिछठ्ठी माताको कथा श्रवण गरेको यशोधरा गाउंपालिका वडा नं. ३ का ध्यानेन्द्रमणि त्रिपाठीले बताए । छोराको लागि मेरी पत्नीले त्रिछठ्ठी पुजा सम्पन्न गरिन्, त्रिपाठीले भने, “हाम्रो समुदायका छोरा हुने सवै महिलाहरुले हर्ष उल्लासका साथ यो पर्व मनाए ।”
पुजाको अवसरमा महिलाले जोत गोढ नगरेको बांझे खेतमा उब्जिएको धानको चामल (तिन्नी चामल), साग, फलफुल, दही, कागती, महुवा, अम्बा लगायतका खानेकुराहरु खाने गर्छन् । लुम्विनी प्रदेशको कपिलवस्तु, रुपन्देही र नवलपरासी जिल्ला लगायत तराई मधेशमा यो पर्वलाई महिलाहरुले हरेक वर्ष धुमधामका साथ मनाउने गरेका छन् ।
त्रिछठ्ठी पर्व तराई मधेशका महिलाहरुको पवित्र पर्व भएका कारण यस दिन पालिका स्तरबाट सार्वजनिक स्थानीय विदा दिनु पर्ने कपिलवस्तु नगरपालिका वडा नं. २ की शिक्षिका प्रतिभा श्रीवास्तवले बताईन् ।
