साझा न्युज । कपिलवस्तु
कपिलवस्तु नगरपालिका वडा नं. ३ सिकोटवा गाउंमा झाडा पखाला तथा हैजाका विरामीहरु देखा परेका छन् । विगत ४।५ दिन यता सो गाउंका केही घरमा झाडा पखालाका विरामीहरु देखिएका थिए । ति विरामीहरु मध्ये २ जना एन्टीजेन परीक्षण गर्दा १ जनामा शंकास्पद हैजा देखिएको छ ।
झाडा पखालाका विरामीहरुको संख्या बढ्न थाले पछि गाउंमा हैजा फैलन नदिन स्वास्थ्यकर्मीको टोली सिकोटवा गाउंमा परिचालन गरिएको कपिलवस्तु नगरपालिकाका नगर प्रमुख सुदीप पौडेलले बताए ।
सो गाउंबाट झाडा पखालाका विरामीहरु अस्पताल आएको र उनीहरुको सघन ढंगबाट उपचार भई रहेको कपिलवस्तु अस्पतालका मेडिकल सुपरिटेण्डेन्ट डा. विपिन जयसवालले बताए । अस्पताल आएका कुनै पनि वान्ता तथा झाडा पखालाका विरामीहरुलाई छुट्टै राखेर विशेष ढंगबाट उपचार गर्न स्वास्थ्यकर्मीहरुको एक स्पेशल टोली परिचालन गरेका छौं, “मे.सु.डा.जयसवालले भने, दुषित खानेपानी र सरसफाई अभावका कारण यस प्रकारको रोगहरु देखिएको हुन सक्छ ।”
कालिका स्वावलम्वन सामाजिक केन्द्रले डब्लु.एच.एच.सहयोगमा उपलब्ध गराएकाे पानी जांच्ने किट तथा केमिकल र स्वयंसेवीहरूबाट सिकाेटवा गाउंका घर घरमा अहिले खानेपानीको शुद्धता चेक जांच गरिरहेका छन् ।
नगर प्रमुख सुदीप पौडेलको निर्देशनमा तत्काल रोगग्रस्त गाउंमा नगरपालिकाबाट आवश्यक स्वास्थ्य सामाग्रीहरु सहित स्वास्थ्यकर्मीको टोली खटाईएको छ ।
उनीहरुले स्वास्थ्य सल्लाह सहित मास्क, सेनिटाईजर, सावुन लगायतका स्वास्थ्य सामाग्री वितरण गरेका छन् । विरामी भएका घर परिवारको अनुगमन गर्दा उनीहरुले प्रयोग गर्ने शौचालय व्यवस्थित नभएका कारण त्यहांबाट हैजाको किटाणुहरु फैलिएको कपिलवस्तु नगरपालिकाकी स्वास्थ्य शाखाकी निमित्त प्रमुख उमा थापाले बताईन् ।
कपिलवस्तु जिल्लालाई पुर्ण खुलामुक्त जिल्ला घोषणा गरिए पनि शौचालयको प्रयोग नहुनु, प्रयोग भए पनि व्यवस्थित नहुनु, खानेपानी दुषित हुनु, स्वास्थ्य सम्वन्धी बानी व्यवहारमा ध्यान नदिईनु जस्ता कारणबाट जिल्लामा पटक पटक झाडा पखाला तथा हैजा जस्ता प्रकोपहरु देखिने गरेको छ ।
