साझा न्यूज । कपिलवस्तु
कपिलवस्तु, २७ चैत्र । कपिलवस्तु नगरपालिका वडा नं. २ वर्दहवा स्थित गौतम बुद्ध आधारभूत विद्यालयले महिला समाजसेवी तथा सेतो गुरास संस्थाकी प्रमुख रीता बोहरालाई सम्मान गरेको छ । विद्यालयमा स्थापना कालमा वाल विकास केन्द्र स्थापना तथा विद्यालय संचालनमा महत्वपूर्ण योगदान गरेको भन्दै सेतो गुरास संस्थाकी प्रमुख बोहोरालाई सम्मान गरिएको हो ।
कपिलवस्तु नगरपालिका शिक्षा शाखा प्रमुख उपसचिव हरि प्रसाद ज्ञवाली, शाखा अधिकृत विनोद कुंवर, विद्यालय व्यवस्थापन समितिका अध्यक्ष मुख्तार अहमद खां, विद्यालयकी प्रधानाध्याक सुजता सुवालले संयुक्त रुपमा बोहोरालाई सम्मान गरेका हुन् ।
सम्मान कार्यक्रममा सम्माानित भएकी महिला समाजसेवी वाेहराले विद्यालय शुरुवाती अवस्था देखि हाल सम्म आउंदा ठुलो शैक्षिक तथा भौतिक परिवर्तन भएको प्रति खुशी व्यक्त गरेकी छिन् । विद्यालय व्यवस्थापन समितिका अध्यक्ष मुख्तार अहमद खांले विद्यालयको शैक्षिक विकासका लागि विद्यालयका शिक्षक कर्मचारी, भौतिक विकासका लागि वडा, स्थानीय तथा प्रदेश सरकार र स्थानीय समुदायले खेलेको भुमिका प्रति आभार व्यक्त गरेका छन्
कार्यक्रमका प्रमुख अतिथि कपिलवस्तु नगरपालिकाका शिक्षा शाखा प्रमुख हरि प्रसाद ज्ञवालीले नगरपालिका क्षेत्रमा सामुदायिक विद्यालयहरुमा उदाहरणीय रुपमा विद्यालय संचालन हुदै आएको भन्दै सवै सामुदायिक विद्यालयहरुका शिक्षक कर्माचारी तथा अभिभावकहरुले आआफ्नो जिम्मेवारी जवाफदेही ढंगबाट पुरा गर्न आग्रह गरेका छन् ।
कार्यक्रममा विद्यालयकी प्रधानाध्यापक सुजता सुवालले विद्यालय संचालनमा शिक्षक स्टाफको सक्रियतालाई वडा, नगर तथा प्रदेश सरकार सम्मको सहयोग र अभिभावकको निगरानीले विद्यालयलाई नमूना विद्यालय बनाउन आफुहरु अग्रसर रहेको बताईन् । कार्यक्रम विद्यालय व्यवस्थापन समितिका अध्यक्ष मुख्तार अहमद खांको अध्यक्षतामा सम्पन्न भएको थियो ।
विद्यालयमा बाल विकास देखि कक्षा ४ सम्म १ सय ८१ विद्यार्थी अध्ययनरत छन् । कपिलवस्तु नगरपालिकाको उत्कृष्ट विद्यालयको रुपमा गौतम बुद्ध आधारभूत विद्यालय गणनामा रहेको नगरपालिकाको शिक्षा शाखाले जनाएको छ ।
