साझा न्यूज । कपिलवस्तु
गहु खेतमा लागेको आगो सल्कदा यशोधरा गाउंपालिका वडा नं. १ को पकडी गाउंमा भएको आगलागीबाट ४० घर जलेर नष्ट भएका छन् । आगलागीबाट गहुं बाली भित्र्याएर कोठामा राखेको लाखौं रुपैया मुल्यका ठुलो परिमाणको गहुं जलेर नष्ट भएको छ ।
रमवापुर गाउं पुर्व तर्फ रहेको गहुं खेतमा लागेको आगो पश्चिमी हावाले फैलदै पकडी गाउंका ४० घर जलेर नष्ट भएको प्रहरी चौकी बलुहवाले जनाएको छ । आगलागीका कारण घरमा भएको लत्ता कपडा, खाद्यान्न लगायत सम्पूर्ण सामाग्री जलेर खरानी भएको छ ।
आगलागीबाट पिडित बनेका ४० घर परिवार अहिले खुला आकाश मुनि रात विताउन बाध्य छन् । आगलागीबाट करीब १ करोड रुपैया बढीको क्षति भएको यशोधरा गाउंपालिका वडा नं. १ का वडा अध्यक्ष अब्दुल कैयुम खानले बताए । आगलागी पिडितहरुलाई खानपिनको व्यवस्थापन वडा अध्यक्ष खानले गरेका छन् ।
आगलागी भएको घरहरु मध्ये ३१ घर परिवारका सदस्यहरुको शरीरमा लगाएको एक सरो लुगा बाहेक केही बचेको छैन, वडा अध्यक्ष खानले भने, “आगलागी पिडितहरुको राहतका लागि वडा स्तरीय विपद् व्यवस्थापन समितिको वैठक बसेर तत्काल आवश्यक पर्ने राहत सामाग्रीहरु खरिद गर्ने तथा अन्य विभिन्न सहयोगी निकायहरुलाई सहयोगका लागि आग्रह गरेका छौं ।”
संघीय सांसद सुरेन्द्र राज आचार्य, लुम्विनी प्रदेश सभाका सदस्य सुधाकर पाण्डेय, नेपाली कांग्रेसका जिल्ला सहसचिव वजिह अरसद, युवा नेता अनुप कुमार पाण्डेय लगायतले आगलागी पिडितहरुलाई पकडी गाउंमा भेटेर थप सहयोगका लागि गाउंपालिका, प्रदेश सरकार र केन्द्र सरकारसंग पहल गरिरहेको बताएका छन् ।
हरेक दिन जसो हुने आगलागी नियन्त्रणका लागि गाउंपालिकामा एउटा वारुण यन्त्रको अति आवश्यक रहेको युवा नेता अनुप कुमार पाण्डेयले बताए । आफुहरुले वारुण यन्त्र खरिदका लागि गाउंपालिकाले निर्णय गर्नका लागि सुझावमूलक दवाव दिने बताए ।
आगलागीबाट स्थानीय विमलावती रैदासको घरमा रहेका ग्यास सिलिण्डर विष्फोट हुदा आगलागीबाट जलेर क्षति भएको घर विष्फोटका कारण झनै क्षति भएको छ । आगलागी बढ्दै जांदा वडा नं. १ को रजवापुर र तितिर्खी गाउंमा आगो सल्कन नदिन स्थानीयले रजवापुर र तितिर्खी गाउंको पश्चिम तर्फको खेत जोती खेतभरी पानी भरेका थिए
अनि मात्र यी दुई गाउं आगलागीबाट जोगिएको वडा अधयक्ष खानले बताए । करीब ५ घण्टा पछि कपिलवस्तु नगरपालिकाको दमकल, नेपाल प्रहरी, शशस्त्र प्रहरी र स्थानीय सवै मिलेर आगो निभाएका थिए । आगलागी पिडितहरुको सहयोगका लागि नेपाली कांग्रेसका नेता रवि ठाकुरले आफ्नो फेसबुक पेजबाट विभिन्न सहयोगी संघ संस्थाहरुसंग अपील गरेका छन् ।
