साझा न्यूज । कपिलवस्तु
गाउं घरमै व्यवस्थित बर्थिङ्ग सेन्टर संचालनमा आए पछि शुद्धोधन गाउंपालिका वडा नं. ३ लवनी क्षेत्रका महिलाहरु स्वास्थ्य केन्द्रमा सन्तान जन्माउन थालेका छन् । केही वर्ष अघि सम्म घरमै असुरक्षित ढंगबाट सुत्केरी गराउंदै आएका महिलाहरुले अब अनिवार्य रुपमा लवनी स्थित स्वास्थ्य केन्द्रमा सन्तान जन्माउंछन् ।
हरेक महिना १ सय बढी महिलाहरुले यहां आएर सुत्केरी हुने गरेको लवनी स्वास्थ्य चौकीकी सिनियर अनमी किरण धोबीले बताईन् । आज भोली घरमा सुत्केरी हुने क्रम पूर्ण रुपमा हटेको छ । हाम्रो स्वास्थ्य केन्द्रमा ल्याब सेवा भएका कारण गर्भवती महिलाले चेकजांचकै दिनबाट निरन्तर रुपमा स्वास्थ्य केन्द्रको सम्पर्कमा रहन्छन्, उनले भनिन्, “ल्याब चेक जांचबाट गर्भवती भएको थाहा भए लगत्तै हामीले गर्भवती महिलालाई पहिलो भेट कार्ड बनाई दिन्छौं । उनीहरु निरन्तर रुपमा हाम्रै सम्पर्कमा रहन्छन् । अनी सुत्केरी पनि स्वास्थ्य संस्थामै गर्न आउंछन् ।”
शुद्धोधन गाउंपालिकाले आफ्नो ८ वटा सवै वडामा एम्बुलेन्स संचालनको व्यवस्था मिलाएको छ । जसका कारण पनि सुत्केरी हुन गर्भवती महिलाहरुलाई स्वास्थ्य संस्थामा पुग्न सहज भएको छ । पहिला पहिला सुत्केरी गराउन जिल्ला अस्पताल जानु पर्ने बाध्यता अब हटेको छ ।
यो सेवालाई थप प्रभावकारी गराई नागरिकलाई प्रभावकारी स्वास्थ्य सेवा दिन आफु सवै जनप्रतिनिधीहरु लागि परेको शुद्धोधन गाउंपालिकाका प्रमुख कमलेश शरण चौधरीले बताए ।
बर्थिङ्ग सेन्टरमा सुत्केरी गराउंदा बाल तथा मातृ मृत्यु दरमा पनि कमी आउने गरेको छ । बर्थिङ्ग सेन्टरबाट आफुहरुले सन्तोषजनक सेवा पाई रहेको शुद्धोधन गाउंपालिका वडा नं. १ का स्थानीय अगुवा अली हुसेनले बताए ।
