साझा न्यूज । कपिलवस्तु
जर्मन सरकारको वेल्टहंगरहिल्फेको सहयोग र कालिका स्वावलम्वन सामाजिक केन्द्र तथा फरवार्ड नेपाल विचको संझौतामा संचालित अधिकारमुखी सुधारिएको खाद्य प्रणाली परियोजना अन्र्तगत गरिएका क्रियाकलापहरुको संयुक्त रुपमा अनुगमन गरिएको छ ।
परियोजना दक्षिणी क्षेत्रका मायादेवी, यशोधरा र शुद्धोधन गाउंपालिकामा संचालनमा रहेको छ ।
परियोजनाले ३ वटा पालिकाका ४ हजार ५ सय साना किसान र ५ सय भूमिहिनहरुको खाद्य उत्पादनको उपलब्धता र पहुंचको साथै जिविकोपार्जनमा सुधारका लागि विभिन्न क्रियाकलापहरु संचालन गरिरहेको कालिका स्वावलम्वन सामाजिक केन्द्रका कार्यक्रम अधिकृत अशोक चन्द्र लम्सालले बताए ।
संयुक्त अनुगमनमा जिल्ला समन्वय समितिका प्रमुख बाबुराम आचार्य, शुद्धोधन गाउंपालिकाका प्रमुख कमलेश शरण चौधरी, मायादेवी गाउंपालिकाकी उपप्रमुख सरस्वती यादव, यशोधरा गाउंपालिकाका प्रमुख शिवदयाल तिवारीको उपस्थिति रहेको थियो ।
सो अनुगमन कार्यक्रममा स्वास्थ्य कार्यालयका प्रतिनिधी, ३ वटै पालिकाका पालिकाका कृषि, पशु, स्वास्थ्य, पोषण, सामाजिक विकास शाखाका प्रतिनिधीहरु तथा पत्रकारहरुको उपस्थिति रहेको थियो ।
अनुुगमनका क्रममा कार्यक्रम लागू भएका पालिकाका विभिन्न वडाहरुमा पोषण बगैचा, भकारो सुधार, हेण्डपम्प चौतारो, सीपमुलक तालिम, स्थानीय युवा क्लबहरुसंग भेटघाट तथा छलफल, लिजमा पोखरी लिएर भूमिहिनले शुरु गरेको माछा पालन व्यवसाय लगायतका क्रियाकलापहरुको अवलोकन गरिएको कार्यक्रम संयोजक कमला सापकोटाले बताईन् ।
सो अवसरमा मायादेवी गाउंपालिकाका स्वास्थ्य शाखा प्रमुख महेन्द्र यादवले कार्यक्रमले पोषण, स्वास्थ्य सुधार, जिविकोपार्जन लगायतका काममा महत्वपूर्ण योगदान पुर्याएको भन्दै कार्यक्रमको पूर्ण सफलताको लागि पालिकाबाट सक्दो सहयोग गर्ने प्रतिवद्धता जनाए ।
संयुक्त अनुगमन पछि समन्वय समितिका प्रमुख बाबुराम आचार्यले आफुलाई यो कार्यक्रम निकै प्रभावकारी लागेको बताए ।
कालिकाले समुदायमा गर्ने कार्यक्रम तथा क्रियाकलापहरु लक्षित वर्ग मुखी रहेको र समुदायको विकासका लागि कालिकाको भूमिका महत्वपूर्ण रहेको बताए ।
