कपिलवस्तु, असार ३ गते । यशोधरा गाउँपालिकाको सहयोगमा दलित सामाजिक विकास केन्द्रको आयोजना गरिएको “जनप्रतिनिधि र कर्मचारीहरूका लागि टोल विकास संस्था गठन तथा परिचालनसम्बन्धी अभिमुखीकरण कार्यक्रम” तौलिहवामा सम्पन्न भएको छ।
कार्यक्रमको अध्यक्षता सूर्य मती पासीले गर्नुभएको थियो भने गाउँपालिका अध्यक्ष शिव दयाल तिवारी प्रमुख अतिथि रहनुभएको थियो। कार्यक्रमका विशिष्ट अतिथि प्रमुख प्रशासकीय अधिकृत ऋषभ देव खनाल हुनुहुन्थ्यो।
सामाजिक विकास शाखा प्रमुख कृष्णनाथ पाण्डेले स्वागत मन्तव्य राख्नुभएको कार्यक्रममा दलित सामाजिक विकास केन्द्रका कार्यकारी निर्देशक रामशरण रैदसले कार्यक्रममा प्रस्तुत गरिएका उद्देश्यहरू र अपेक्षित नतिजाबारे जानकारी गराउनुभयो।
कार्यक्रममा ‘टोल विकास संस्था’को अवधारणा, उद्देश्य र कार्यप्रणालीबारे विस्तृत रुपमा जानकारी दिइएको थियो। सहभागीहरूलाई टोल विकास संस्था समुदायमा कसरी गठन गर्ने, यसको भूमिकाबारे सचेत गराइयो।
गाउँपालिका अध्यक्ष शिव दयाल तिवारीले सम्बोधन गर्दै भन्नुभयो, “स्थानीय विकासको मेरुदण्डको रूपमा टोल विकास संस्था अगाडि आउन सक्छ। सरकार र समुदायबीचको सेतु बन्ने यस संस्थाले विकास योजनाहरूको कार्यान्वयनमा उल्लेखनीय भूमिका खेल्नेछ।”
प्रमुख प्रशासकीय अधिकृत ऋषभ देव खनालले समुदायको सक्रिय सहभागिता विना दिगो विकास सम्भव नरहेको उल्लेख गर्दै भन्नुभयो, “टोल विकास संस्था परिचालनले स्थानीय स्रोत र आवश्यकताको पहिचानमा समेत सहजता ल्याउनेछ।”
कार्यक्रममा रेशमराज शर्माले स्वीकृत बजेटअनुसार सहकार्यका साथ कार्य अघि बढाउने प्रतिबद्धता व्यक्त गर्नुभयो। उहाँले भने, “हामीले बजेट उपयोग गर्न सकेमा भविष्यमा थप बजेट सुनिश्चित गर्न सकिन्छ।”
कार्यक्रममा सहभागी जनप्रतिनिधिहरूले आफ्ना वडामा शौचालय, खानेपानी, सरसफाइ, सामाजिक एकता, र पूर्वाधार निर्माणजस्ता विषयमा टोल विकास संस्थामार्फत ठोस योजना बनाइ कार्यान्वयन गर्नुपर्नेमा जोड दिएका थिए।
अभिमुखीकरण कार्यक्रममा गाउँपालिकाका विभिन्न वडाका जनप्रतिनिधिहरू, कर्मचारी, सामाजिक संघसंस्था र सरोकारवालाहरूको उल्लेख्य उपस्थिति रहेको थियो।
टोल विकास संस्था सम्बन्धी अभिमुखीकरण कार्यक्रम सम्पन्न
