कपिलवस्तु । हात्तीपाइले रोग नियन्त्रणका उद्देश्यले कपिलवस्तुमा सञ्चालन हुँदै आएको आम औषधि सेवन अभियान यस वर्ष १७ औँ पटक सञ्चालन हुने भएको छ । अभियानलाई प्रभावकारी बनाउन स्वास्थ्य कार्यालय कपिलवस्तु तथा इपिडिमियोलोजी तथा रोग नियन्त्रण महाशाखा टेकुको आयोजनामा तौलिहवामा सञ्चारकर्मीहरूसँग छलफल कार्यक्रम सम्पन्न गरिएको छ ।
महाशाखाका रामकुमार महतोले हात्तीपाइले रोगको प्रकृति, संक्रमण विधि तथा औषधि सेवन अभियानको आवश्यकता विषयक विस्तृत प्रस्तुतीकरण गर्नु भएको थियो ।
नेपालमा क्युलेक्स प्रजातिको लामखुट्टेमार्फत सारिने परजीवीका कारण हात्तीपाइले रोग फैलिने गर्दछ । धेरै संक्रमितमा लक्षण नदेखिने भए पनि केहीमा हात, खुट्टा, अन्डकोष तथा अन्य अङ्गहरू सुन्ने जस्ता समस्या देखापर्ने महतोले जानकारी दिनुभयो । नेपालमा यो रोग विरुद्धको आम औषधि सेवन कार्यक्रम सन् २००३ देखि सञ्चालनमा आएको हो ।
कपिलवस्तुमा विगत १६ वर्षदेखि अभियान सञ्चालन हुँदै आएको स्वास्थ्य कार्यालयका प्रमुख ढकालले बताउनुभयो । उहाँका अनुसार जिल्लामा प्रत्येक १ हजार जना मध्ये चार जनामा हात्तीपाइलेको संक्रमण पाइने तथ्यांकले देखाएको छ ।
जिल्लाका कृष्णनगर, महाराजगञ्ज, कपिलवस्तु नगरपालिका, यशोधरा, मायादेवी र शुद्धोधन पालिकामा समुदायस्तरमा पुनः संक्रमण देखिएपछि आगामी मंसिर ७ गतेदेखि सो पालिकाहरूमा आम औषधि सेवन अभियान सञ्चालन हुने भएको छ ।
अभियानबारे जानकारी दिँदै प्रमुख ढकालले औषधि सेवनलाई पूर्ण रूपले सफल बनाउन सञ्चारकर्मीहरूको भूमिका महत्वपूर्ण रहेको उल्लेख गर्दै जनस्तरमा सचेतना वृद्धि गर्न सहयोग गर्न आग्रह गर्नुभयो ।
नेपाल पत्रकार महासङ्घ कपिलवस्तु शाखाका अध्यक्ष डिलाराम भुसालले सार्वजनिक स्वास्थ्य जस्तो संवेदनशील विषयमा सूचना र तथ्यका आधारमा समाचार प्रवाह गर्नुपर्नेमा जोड दिनुभयो । उहाँले अभियान सफल बनाउन महासङ्घ र सञ्चारकर्मीहरूको सहयोग निरन्तर रहने विश्वास व्यक्त गर्नुभयो । छलफल कार्यक्रममा जिल्लाका सक्रिय सञ्चारकर्मीहरूको उल्लेख्य सहभागिता रहेको थियो ।
हात्तीपाइले विरुद्धको आम औषधि सेवन अभियान १७ औँ पटक सञ्चालन हुदै
