कपिलबस्तु, मङ्सिर ९ गते । औद्योगिक वातावरण सुधारका लागि सहकार्य अनिवार्य रहेको सरोकारवालाहरुले जोड दिनु भएको छ । घरेलु तथा साना उद्योग कार्यालय कपिलबस्तुले तौलिहवामा आयोजना गरेको ११ औं उद्योग दिवसका अवसरमा शुभकामना आदान–प्रदान तथा अन्तरक्रिया कार्यक्रम सो कुरामा जोड दिइएको हो । दिवसको अवसरमा जिल्ला समन्वय समितिको सभाहलमा भएको कार्यक्रममा उद्योग प्रवद्र्धनका चुनौती, सम्भावना र नीतिगत आवश्यकताबारे विस्तृत बहस भएको थियो ।
सो अवसरमा उद्योग कार्यालयका प्रमुख सन्तोष खनालले विस्तृत कार्यपत्र प्रस्तुत गर्दै नेपालमा औद्योगिक क्षेत्र नियमनका कानुनी तथा संस्थागत संरचना, कार्यालयले प्रदान गर्ने सेवा, उद्योग दर्ता–नवीकरण–खारेजी प्रक्रिया, चालू आर्थिक वर्षमा दर्ता भएका उद्योग तथा फर्मको विवरण, उद्योग प्रवद्र्धनका सहयोग तथा औद्योगिक क्षेत्रका वर्तमान चुनौतीबारे जानकारी दिनुभएको थियो ।
तौलिहवा उद्योग वाणिज्य सङ्घका अध्यक्ष गयादिन कुर्मीले जिल्लामा औद्योगिक सम्भावना प्रशस्त भए पनि लगानीमैत्री वातावरण, कर प्रशासन सहजता तथा आवश्यक पूर्वाधारमा राज्यको ध्यान बढ्नुपर्ने धारणा व्यक्त राख्नु भएको थियो । चन्द्रौटा उद्योग वाणिज्य सङ्घका अध्यक्ष ईश्वरी प्रसाद पाण्डेले उद्योग दर्ता प्रक्रिया सरल, छरितो तथा पारदर्शी बनाउनुपर्ने आवश्यकता औँल्याएका थिए ।
कार्यक्रमका प्रमुख अतिथि तथा जिल्ला समन्वय समितिका प्रमुख बाबुराम खनालले स्थानीय तह, निजी क्षेत्र र सरकारी निकायबीच सघन सहकार्यबिना औद्योगिक वातावरण मजबुत नहुने उल्लेख गर्दै “दिगो अर्थतन्त्रका लागि उद्योगमैत्री प्रशासन, आधारभूत पूर्वाधार र सीपयुक्त जनशक्ति अपरिहार्य छन्” भन्नुभयो । उहाँले जिल्लामा उद्योग विस्तारका लागि सहजीकरणका कार्यक्रम प्राथमिकतामा राखिने पनि बताउनुभयो ।
कार्यक्रममा सहायक प्रजिअ पदम लाल लामिछाने, कोष तथा लेखा नियन्त्रक कार्यालयका प्रमुख खगेन्द्र प्रसाद अर्याल, सहित उद्योगी, व्यवसायी र सरोकारवालाको सक्रिय सहभागिता रहेको थियो । घरेलु तथा साना उद्योग कार्यलयका विष्णु प्रसाद पोखरेलको स्वागतमा भएको कार्यक्रमको सञ्चालन विनय कुमार पुडा शैनीले गरेका थिए ।
औद्योगिक वातावरण सुधारका लागि सहकार्य अनिवार्य
