कपिलवस्तु निर्वाचन क्षेत्र नं.१ का स्वतन्त्र उम्मेदवार आशिष शर्माले मतदातासँग एकपटक आफूलाई अवसर दिन आग्रह गर्दै
जनताले अवसर दिए परिवर्तनको स्वरुप कस्तो हुन्छ भन्ने स्पष्ट गरिदिने उद्घोष गरेका छन् ।
उनले लामो समयदेखि कपिलवस्तुमा विकास र सुशासनका नाममा जनतालाई केवल आश्वासन मात्र बाँडिएको भन्दै अब वास्तविक परिवर्तनका लागि नयाँ सोच र नयाँ नेतृत्व आवश्यक रहेको बताएका छन्।
चुनावी अभियान अन्तर्गत विभिन्न स्थानमा आयोजित भेटघाट कार्यक्रममा बोल्दै शर्माले पुरानै अनुहार र पुरानै शैलीले जनताको अपेक्षा पूरा गर्न नसकेको दाबी गरे।
उनले भने, “जनताले पटक–पटक फरक–फरक दलका उम्मेदवारलाई जिताए, तर विकासको अनुभूति अझै जनताले गर्न सकेका छैनन्। शिक्षा, स्वास्थ्य, रोजगारी, सडक, सिँचाइ र कृषिमा समस्या उस्तै छ। अब परिवर्तनको लागि जनताले विवेकपूर्ण निर्णय लिनुपर्छ। मलाई एक पटक मौका दिनुस्, म परिवर्तन देखाउँछु।”
उम्मेदवार शर्माले कपिलवस्तुमा बेरोजगारी ठूलो समस्या बनेको उल्लेख गर्दै युवाहरू अवसरको खोजीमा विदेशिन बाध्य भएको बताए। उनले कृषि, पर्यटन, साना उद्योग तथा व्यवसाय प्रवर्द्धन गरेर स्थानीयस्तरमै रोजगारी सिर्जना गर्ने प्रतिबद्धता व्यक्त गरे। “हाम्रो युवा विदेशमा पसिना बगाइरहेका छन्। यहाँ अवसर छैन। यदि योजनाबद्ध रूपमा काम गरियो भने कपिलवस्तुमा नै रोजगार सिर्जना गर्न सकिन्छ,” उनले भने।
त्यस्तै उनले सुशासनलाई आफ्नो मुख्य प्राथमिकता रहेको बताउँदै विकास बजेट पारदर्शी रूपमा खर्च गर्ने र भ्रष्टाचार, कमिसन तथा पहुँचको राजनीति अन्त्य गर्ने दाबी गरे। “जनताले तिरेको कर र राज्यबाट आएको बजेट सही ठाउँमा खर्च हुनुपर्छ। विकासका नाममा हुने अनियमितता रोक्नुपर्छ। म निर्वाचित भए जनताको पैसाको एक–एक रुपैयाँ जनताको निगरानीमा पारदर्शी बनाउनेछु,” शर्माले बताए।
कृषि क्षेत्रका विषयमा बोल्दै उनले कपिलवस्तु उर्वर भूमि भएको जिल्ला भए पनि किसानहरू मल, बीउ, सिँचाइ र बजारको समस्याबाट पीडित रहेको बताए। किसानलाई उचित मूल्य दिलाउने, उत्पादनलाई बजारसँग जोड्ने र आधुनिक कृषि प्रणालीतर्फ लैजाने योजना रहेको उनले उल्लेख गरे। “किसानले उत्पादन गर्छ तर उचित मूल्य पाउँदैन, बिचौलियाले फाइदा लिन्छ। यो व्यवस्थालाई सुधार गर्नुपर्छ,” उनले भने।
स्वास्थ्य र शिक्षाको अवस्था सुधार गर्नुपर्नेमा जोड दिँदै शर्माले ग्रामीण क्षेत्रका स्वास्थ्य चौकीहरूलाई प्रभावकारी बनाउने, आधारभूत स्वास्थ्य सेवा गाउँमै उपलब्ध गराउने तथा विद्यालयमा गुणस्तरीय शिक्षा सुनिश्चित गर्ने बताए। उनले रोजगारमुखी र प्राविधिक शिक्षालाई प्राथमिकतामा राख्ने समेत प्रतिबद्धता जनाए।
यसैबीच, चुनावी अभियानसँगै कपिलवस्तु निर्वाचन क्षेत्र नं। १ मा स्वतन्त्र उम्मेदवार आशिष शर्माप्रति जनचासो बढ्दै गएको देखिएको छ। स्थानीय युवा, व्यवसायी तथा सर्वसाधारणले पुरानै शैलीको राजनीतिबाट दिक्क भएर नयाँ विकल्पको खोजी गरिरहेको भन्दै यसपटक परिवर्तन सम्भव हुने विश्वास व्यक्त गरेका छन्।
