महोत्तरीको जलेश्वर–बर्दिबास सडकखण्ड अन्तर्गत बथनाहा गाउँमा मंगलबार बिहान भएको दुई मोटरसाइकलको ठक्कर र आगलागीमा परी मृत्यु भएका तीनै जनाको पहिचान खुलेको छ।
ज्यान गुमाउनेहरू सबै विद्यार्थी रहेको प्रहरीले पुष्टि गरेको छ।
जिल्ला प्रहरी कार्यालय महोत्तरीका अनुसार मृत्यु हुनेमा जलेश्वर नगरपालिका–६ बस्ने २० वर्षीय शुभाष दास, सोही ठाउँका २० वर्षीय रवि दास र एकडारा गाउँपालिका–३ का २० वर्षीय अभिषेक मण्डल रहेका छन्।
दुर्घटनामा परी मोटरसाइकलमा आगलागी भएपछि शवहरू जलेको अवस्थामा भेटिएका थिए। जिल्ला प्रहरी कार्यालयका प्रवक्ता एवं प्रहरी नायब उपरीक्षक (डीएसपी) शैलेन्द्र भट्टका अनुसार घटनास्थलमा पुगेका आफन्तहरूले सनाखत गरेपछि मृतकहरूको पहिचान खुलेको हो।
प्रहरी नायब उपरीक्षक भट्टले मृतकहरूको शवको पहिचान भइसकेको र अब कानुनी प्रक्रिया पूरा गरी शव परीक्षणका लागि पठाइने जानकारी दिए।
सोही दुर्घटनामा परेर अन्य तीन जना युवाहरू गम्भीर घाइते भएका छन्। उनीहरूको शरीरका विभिन्न भाग जलेको छ।
घाइते हुनेहरूमा जलेश्वर नगरपालिका–६ का १९ वर्षीय रोहित दास र सोही ठाउँका १९ वर्षीय अभय कापर रहेका छन्।
त्यसैगरी, एकडारा गाउँपालिका-५ बथनाहाका २० वर्षीय अजय कापर पनि सोही दुर्घटनामा परी गम्भीर घाइते भएका छन्।
घाइते तीनै जनाको स्थानीय अस्पतालमा प्रारम्भिक उपचार भइरहेको र थप उपचारका लागि तयारी भइरहेको प्रहरीले जनाएको छ।
जलेश्वरबाट बर्दिबास तर्फ जाँदै गरेको र विपरीत दिशाबाट आउँदै गरेको मोटरसाइकल बथनाहामा एकापसमा ठोक्किएका थिए।
