दलित सामाजिक विकास केन्द्र र युनाइटेड मिसन टु नेपाल (युएमएन)को संयुक्त साझेदारीमा सञ्चालित जीवन सुधार परियोजनाअन्तर्गत कार्यक्रमहरूको अनुगमन गरिएको छ। युएमएनका कार्यकारी निर्देशक धना लामाले यशोधरा गाउँपालिका–१ रजवपुर तथा वडा नं. ३ बहडिलवामा सञ्चालन भइरहेका कार्यक्रमहरूको स्थलगत अनुगमन गर्नुभएको हो।
अनुगमनका क्रममा रजवपुरस्थित यशोधरा आत्मनिर्भर समूहले सञ्चालन गरेका विभिन्न आयआर्जनमूलक व्यवसायका गतिविधिबारे जानकारी लिइएको थियो। त्यस्तै, बहडिलवामा रहेको चाँदनी एकीकृत फार्ममा भर्मिकम्पोस्ट मल उत्पादन तथा भर्मी वास प्रविधिबारे छलफल तथा अवलोकन गरिएको थियो।
कार्यकारी निर्देशक लामाले परियोजनाअन्तर्गत सञ्चालन भएका कार्यक्रम सन्तोषजनक रहेको बताउँदै यसले स्थानीय समुदायको आयआर्जन र आत्मनिर्भरता अभिवृद्धिमा टेवा पुर्याएको उल्लेख गर्नुभयो। उहाँले यस्ता कार्यक्रमलाई अझ व्यवस्थित र दिगो बनाउन स्थानीय तह तथा सरोकारवालाबीच सहकार्य आवश्यक रहेको धारणा व्यक्त गर्नुभयो।
दलित सामाजिक विकास केन्द्रका कार्यकारी निर्देशक रामशरण रैदासले भर्मिकम्पोस्ट उत्पादनमा संलग्न कृषकहरूले उत्पादनसँगै बजारीकरणमा पनि ध्यान दिनुपर्ने बताउनुभयो। उहाँले उत्पादनलाई बजारसँग जोड्न सके कृषकको आम्दानीमा थप वृद्धि हुने विश्वास व्यक्त गर्नुभयो।
अनुगमनमा जीवन सुधार परियोजनाका परियोजना अधिकृत रमेश प्रसाद कुर्मी, परियोजना व्यवस्थापक शिपुरा महतो लगायतको सहभागिता रहेको थियो। कार्यक्रममा स्थानीय समूहका सदस्यहरूले सञ्चालन गरेका व्यवसाय तथा प्रविधिको प्रभावकारिताबारे छलफल गरिएको थियो।
