शुद्धोधनमा ‘समृद्धि’ परियोजना परिचयात्मक कार्यक्रम

कपिलवस्तु । जिल्लाको शुद्धोधन गाउँपालिकामा विद्यालय बाहिर रहेका किशोरीहरूको सशक्तीकरण तथा सीप विकास गर्ने उद्देश्यले ‘समृद्धि’ कार्यक्रम सञ्चालनमा ल्याइएको छ । केयर नेपालको आर्थिक सहयोग, दलित सामाजिक विकास केन्द्रको आयोजनामा तथा शुद्धोधन गाउँपालिकाको समन्वयमा कार्यक्रमको परिचयात्मक कार्यक्रम सम्पन्न गरिएको हो ।
कार्यक्रममा परियोजनाबारे विस्तृत जानकारी परियोजना अधिकृत रत्न डाँगीले प्रस्तुत गर्नुभएको थियो । ‘समृद्धि’ कार्यक्रम सन् २०२६ जनवरी २० देखि २०२६ अक्टोबर ३१ सम्म सञ्चालन हुने छ । कार्यक्रम शुद्धोधन गाउँपालिका अन्तर्गत वडा नम्बर ४ र ६ मा सञ्चालनमा रहको छ ।
परियोजनाले विद्यालय बाहिर रहेका १५ देखि २४ वर्ष उमेर समूहका किशोरी महिलालाई लक्षित गरेको छ, विशेषगरी कक्षा ५ देखि ८ बीच पढाइ छोडेका किशोरीहरूलाई समेटिएको छ । कार्यक्रम अन्तर्गत चार वटा समूहमा १०४ जना किशोरीलाई समावेश गरिएको छ, जसमा वडा नम्बर ४ मा एक र वडा नम्बर ६ मा तीन समूह गठन गरिएका छन् ।
परियोजनाको मुख्य उद्देश्य किशोरीहरूलाई आधारभूत साक्षरता, संख्यात्मक ज्ञान, डिजिटल तथा उद्यमशीलता सीप प्रदान गर्दै जीवन उपयोगी क्षमतामा अभिवृद्धि गर्नुका साथै उनीहरूलाई शिक्षा र जीविकोपार्जनका अवसरतर्फ अग्रसर गराउनु रहेको छ । साथै बजारमुखी सीप विकासमार्फत आर्थिक सहभागिता वृद्धि गर्ने र स्थानीय तहमा किशोरीहरूको नेतृत्व विकास तथा उद्यमशीलतामा सहजीकरण गर्ने लक्ष्य लिइएको छ ।
सो अवसरमा बोल्दै गाउँपालिका अध्यक्ष कमलेश शरण चौधरीले किशोरीहरूको क्षमता विकास र शिक्षामा पुनः पहुँच विस्तार गर्न यस्ता कार्यक्रमले महत्वपूर्ण योगदान पु¥याउने विश्वास व्यक्त गर्नुभयो । उहाँले स्थानीय सरकार, विद्यालय र सरोकारवाला निकायबीच समन्वय गर्दै योजनाबद्ध रूपमा अघि बढ्नुपर्नेमा जोड दिनुभयो ।
कार्यक्रम दलित सामाजिक विकास केन्द्रका अध्यक्ष सुरजमति पासीको अध्यक्षता, केन्द्रका कार्यकारी निर्देशक रामशरण रैदासको स्वागत तथा कार्यक्रमको उद्देश्य बारे जनाकारी गाउनु भएको थियो । कार्यक्रममा प्रमुख प्रशासकीय अधिकृत सञ्जय चौधरी विभिन्न शाखाका प्रमुख एवं प्रतिनिधि को सहभागिता रहेको थियो ।