कपिलवस्तु। राष्ट्रिय आर्थिक गणना–२०८२ अन्तर्गत कपिलवस्तु जिल्लामा सञ्चालन भइरहेको तथ्याङ्क सङ्कलन कार्यलाई सफल बनाउन सबै सरोकारवाला निकाय तथा व्यवसायीहरूलाई सहयोग गर्न आग्रह गरिएको छ ।
जिल्ला आर्थिक गणना कार्यालय कपिलवस्तुबाट वैशाख २ गतेदेखि असार ७ गतेसम्म सञ्चालन हुने गणनामा जिल्लाभित्र दर्ता भएका तथा नभएका साना तथा ठूला उद्योग, कलकारखाना, व्यापारिक प्रतिष्ठान, होटल तथा रेस्टुरेन्ट, निर्माण कम्पनी, बैंक तथा वित्तीय संस्था, सहकारी, यातायात सेवा प्रदायक, सामाजिक संघ–संस्था, शैक्षिक तथा स्वास्थ्य संस्था लगायतका सबै प्रतिष्ठानमा स्थलगत तथ्याङ्क सङ्कलन गरिनेछ ।
कार्यालयका अनुसार गणनामा सुपरिवेक्षक तथा गणकहरू खटिइसकेको जनाउँदै सम्बन्धित व्यवसाय तथा संस्थाहरूलाई आफ्ना गतिविधिसम्बन्धी सत्यतथ्य विवरण उपलब्ध गराई राष्ट्रिय अभियान सफल बनाउन अनुरोध गरिएको छ ।
जिल्ला आर्थिक गणना कार्यालय कपिलवस्तुका प्रमुख मनोहर हरिजनले आर्थिक गणना मुलुकको अर्थतन्त्र मापन गर्ने महत्वपूर्ण आधार भएकाले सबैले जिम्मेवारीपूर्वक सहयोग गर्नुपर्ने बताउनुभयो । उहाँले संकलित विवरणहरू तथ्याङ्क ऐन, २०७९ बमोजिम पूर्ण रूपमा गोप्य राखिने स्पष्ट पार्दै ढुक्क भएर सही सूचना उपलब्ध गराउन आग्रह गर्नुभयो ।
गणनाबाट प्राप्त तथ्याङ्कले नीति निर्माण तथा विकास योजनामा महत्वपूर्ण योगदान पुग्ने विश्वास व्यक्त गरिएको छ । साथै “अर्थतन्त्र मापनको लागि आर्थिक गणना” भन्ने नारालाई आत्मसात गर्दै अभियानमा सबैको सहभागिता आवश्यक रहेको जनाइएको छ ।
साथै संकलित तथ्यांकहरु नितान्त तथ्यांकका लागि मात्र प्रायोग हुने प्रमुख हरिजनको भनाई छ ।
