कपिलबस्तु, बैशाख ९ गते । भारतको जम्मू–कश्मीरस्थित पहलगाममा भएको आतंकवादी हमलामा ज्यान गुमाएका बुटवल–४ निवासी नेपाली युवा सुदीप न्यौपानेको परिवारले अझैसम्म राहत नपाएको भन्दै सरकारको ध्यानाकर्षण पत्र बुझाइएको छ ।
प्रधानमन्त्रीलाई सम्बोधन गर्दै जिल्ला प्रशासन कार्यालय कपिलवस्तु मार्फत पठाइएको ध्यानाकर्षण पत्रमा घटनाको एक वर्ष पूरा भइसक्दा पनि पीडित परिवारले कुनै राहत वा क्षतिपूर्ति नपाएको गुनासो गरिएको छ ।
पत्रमा उल्लेख गरिएअनुसार २२ अप्रिल २०२५ मा भएको उक्त हमलापछि नेपाल सरकार तथा प्रधानमन्त्रीले पीडित परिवारलाई सहयोग गर्ने र भारत सरकारसँग क्षतिपूर्तिका लागि पहल गर्ने प्रतिबद्धता जनाएका थिए । तर हालसम्म ती प्रतिबद्धता कार्यान्वयन नभएको भन्दै असन्तुष्टि व्यक्त गरिएको हो ।
पीडित परिवारले छोराको निधनपछि आर्थिक तथा मानसिक पीडामा जीवनयापन गरिरहेको उल्लेख गर्दै राज्यको उदासीनताले नागरिकप्रतिको जिम्मेवारीमाथि गम्भीर प्रश्न उठाएको पत्रमा उल्लेख गरिएको छ ।
युवाहरूको तर्फबाट प्रस्तुत गरिएको ध्यानाकर्षण पत्रमा तीन मुख्य माग अघि सारिएका छन् । जसअन्तर्गत सरकारले प्रतिबद्धता अनुसार राहत रकम तत्काल उपलब्ध गराउनुपर्ने, भारत सरकारसँग गरिएको कूटनीतिक पहलको विवरण सार्वजनिक गर्नुपर्ने तथा विदेशमा नेपाली नागरिकमाथि हुने घटनामा परिवारको सुरक्षा र सहायताका लागि ठोस नीति अवलम्बन गर्नुपर्ने उल्लेख गरिएको छ ।
पत्रमार्फत एक साताभित्र ठोस निर्णय नलिए चरणबद्ध आन्दोलनमा उत्रने चेतावनीसमेत दिइएको छ । सुदीप न्यौपानेको प्रथम स्मृति दिवसको सन्दर्भमा उनको सम्झनामा श्रद्धाञ्जली अर्पण गर्दै पीडित परिवारलाई न्याय दिलाउन सरकार गम्भीर बन्नुपर्ने माग समेत गरिएको छ ।
कपिलवस्तुका प्रमुख जिल्ला अधिकारी जनार्दन गौतमले उक्त ध्यानाकर्षण पत्र जस्ताको त्यस्तै सम्बन्धित निकायमा पठाउने बताउनुभएको छ ।
ध्यानाकर्षण पत्र बुझाउन प्रकाश घिमिरे, मधुसुदन भट्टराई, हनुमान पाण्डे, अनिल कुमार क्षेत्री, शिवशंकर कन्दु, देवेन्द्र कुमार पाण्डे लगायत कपिलवस्तुका जागरुक युवाहरूको सहभागिता रहेको थियो ।
वर्ष बित्दा पनि राहत नपाएको भन्दै सरकारलाई ध्यानाकर्षण
