कपिलवस्तु, १२ वैशाख । कपिलवस्तु नगरपालिका–३, डेरवास्थित सिद्धार्थ गौतम बुद्ध गुम्बा प्राविमा दुई कोठे भवनको उद्घाटन गरिएको छ। नेपाल–चाइना फ्रेन्डसिप फोरमको सहयोगमा विद्यालयको दोस्रो तलामा निर्माण गरिएको उक्त भवनको उद्घाटन कपिलवस्तु नगरपालिकाका प्रमुख सुदीप पौडेल, फोरमकी अध्यक्ष झ्याउ मेलिङ तथा वडाध्यक्ष प्रकाश गैरेलगायतको टोलीले संयुक्त रूपमा गरेका हुन्।
सोही अवसरमा विद्यालयमा अध्ययनरत १६० जना विद्यार्थीलाई विद्यालय ब्यागसमेत वितरण गरिएको थियो। कार्यक्रममा बोल्दै नगरप्रमुख पौडेलले फोरमको सहयोगले शिक्षा क्षेत्रमा सकारात्मक प्रेरणा मिलेको उल्लेख गर्दै बालबालिकाको उज्ज्वल भविष्य निर्माणका लागि यस्ता कार्य अत्यन्त महत्त्वपूर्ण रहेको बताउनुभयो। उहाँले शिक्षक–शिक्षिकाहरूको क्षमता अभिवृद्धिका लागि अध्ययन अवलोकन कार्यक्रम सञ्चालन गर्नसमेत फोरमसँग आग्रह गर्नुभयो।
फोरमकी अध्यक्ष झ्याउ मेलिङले चीन र नेपालबीचको मित्रता सधैँ सुदृढ रहेको उल्लेख गर्दै बालबालिकाको शिक्षा सुनिश्चित गर्न सानो सहयोग गरिएको बताउनुभयो। यस्ता सहयोगात्मक कार्यहरू निरन्तर जारी रहने प्रतिबद्धता पनि उहाँले व्यक्त गर्नुभयो।
विद्यालयकी प्रधानाध्यापक शारदा आचार्यका अनुसार फोरमले विद्यालयमा फर्निचर, शौचालयलगायतका पूर्वाधार निर्माणमा पनि सहयोग गरेको छ। कार्यक्रममा जग्गादाता सुनिल ज्ञवालीलाई सम्मान गरिएको थियो भने विद्यालयका शिक्षक–शिक्षिकाहरूलाई पनि सम्मान गरिएको थियो।
कार्यक्रम विद्यालय व्यवस्थापन समितिका अध्यक्ष तथा वडाध्यक्ष प्रकाश गैरेको अध्यक्षतामा सम्पन्न भएको थियो। विद्यालयकी प्रधानाध्यापक शारदा आचार्यले स्वागत मन्तव्य व्यक्त गर्नुभएको थियो।
