नेपालगन्ज, वैशाख १५ गते । हवाई यात्रुलाई विमानस्थलसम्म आवत–जावतमा सहजता प्रदान गर्ने उद्देश्यले नेपालगन्जस्थित राँझा विमानस्थलबाट मङ्गलबारदेखि निःशुल्क सटल बस सेवा सञ्चालनमा ल्याइएको छ ।
नेपालगन्ज विमानस्थल कार्यालयका प्रमुख सन्तोष पोखरेलका अनुसार विमानस्थल परिसरदेखि करिब डेढ किलोमिटर दूरीमा रहेको राँझा चोकसम्म यात्रुलाई ओसार–पसार गर्न मङ्गलबार बिहानदेखि निःशुल्क सटल बस सेवा सुरु गरिएको हो ।
उक्त बसले राँझा चोकबाट विमानस्थलमा आउने तथा त्यहाँबाट प्रस्थान गर्ने यात्रुलाई यात्रामा सहजता प्रदान गर्ने भएकाले यसबाट यात्रुलाई सहज हुने र नियमित रूपमा सेवा दिने जनाइएको छ ।
सटल बस सेवा भनेको छोटो दूरीमा निश्चित स्थानबिच बारम्बार आवत–जावत गर्ने बस सेवा हो । सेवा सुरु भएको पहिलो दिनमै काठमाडौँबाट आएका बुद्ध एयरका यात्रुलाई सटल बसमार्फत राँझा चोकसम्म पुर्याइएको विमानस्थल कार्यालयले जानकारी दिएको छ ।
यस सेवाले यात्रुलाई सहज, सुरक्षित तथा व्यवस्थित यातायात सुविधा उपलब्ध गराउने विश्वास गरिएको विमानस्थल कार्यालयका प्रमुख पोखरेलले बताउनुभयो । उहाँले विभिन्न स्थानबाट सार्वजनिक यातायातमार्फ राँझा चोकसम्म पुग्ने यात्रुलाई त्यहाँबाट विमानस्थलबाट आवत–जावत गर्न सहज हुने बताउनुभयो ।
