तौलिहवा (कपिलवस्तु), वैशाख १९ गते । २५७० औं बुद्ध जयन्तीको अवसर पारेर कपिलवस्तु स्थित बालगृहमा आश्रित बालबालिकालाई सहयोग सामग्री वितरण तथा भोजन कार्यक्रम गरिएको छ ।
प्राचीन कपिलवस्तु बचत समूह, सिद्धार्थटोल तौलिहवाको आयोजनामा सम्पन्न कार्यक्रममा बालगृहमा रहेका ३२ जना असहाय बालबालिकालाई ब्याग, खेलकुद तथा स्टेशनरी सामग्री, झुल लगायतका सामग्री वितरण गर्नुका साथै भोजन दान गराइएको हो ।
कार्यक्रममा नगर प्रमुख सुदीप पौडेलले बुद्धका उपदेशलाई व्यवहारमा उतार्दै मानवसेवामा अग्रसर हुनु आजको आवश्यकता भएको बताउनुभयो । उहाँले यस्ता कार्यक्रमले सामाजिक सद्भाव र सहकार्यलाई बलियो बनाउने उल्लेख गर्नुभयो ।
लुम्बिनी विकास कोषका पूर्व कार्यकारिणी सदस्य राजेश ज्ञवालीले असहाय तथा विपन्न बालबालिकाको संरक्षणमा सामाजिक संघसंस्थाको भूमिका महत्वपूर्ण हुने बताउनुभयो । उहाँले शिक्षा र अवसरको पहुँच विस्तारमा यस्ता पहल निरन्तर हुनुपर्नेमा जोड दिनुभयो ।
मानव अधिकारकर्मी रविन्द्रनाथ ठाकुरले प्रत्येक बालबालिकाको अधिकार सुनिश्चित गर्नु सबैको साझा दायित्व भएको उल्लेख गर्नुभयो । उहाँले असहाय बालबालिकालाई संरक्षण र अवसर प्रदान गर्न सबै पक्षको सहकार्य आवश्यक रहेको धारणा व्यक्त गर्नुभयो ।
नेपाल–भारत मैत्री संघ, रोयल थाई मोनास्ट्री लुम्बिनी, लुम्बिनी स्वर्णभूमि फाउन्डेसन नेपाल, वाट थाई कपिलवस्तु निग्रोधाराम नेपाल, सारिपुत्र फाउन्डेसन तथा नेपाल अर्बुद रोग निवारण संस्थाको सहयोगमा कार्यक्रम भएको छ । समूहकी अध्यक्ष अञ्जना खत्री ज्ञवालीको अध्यक्षता तथा टिका भट्टराई जोशीको स्वागत मन्तव्यमा सम्पन्न कार्यक्रममा सहित्याकार हरिराज शर्मा, समाजसेवी गुणखर गैह्रे लगायतको सहभागिता रहेको थियो ।कार्यक्रमको सञ्चालन नम्रता ठाकुर अधिकारीले गर्नुभएको थियो ।
असहाय बालबालिकालाई सहयोग गर्दै बुद्ध जयन्ती मनाइयो
