काठमाडौं । इन्डियन प्रिमियर लिग (आईपीएल) २०२६ मा १५ वर्षीय प्रतिभाशाली क्रिकेटर वैभव सूर्यवंशीको सहभागितालाई लिएर नयाँ विवाद उत्पन्न भएको छ। कर्नाटकका सामाजिक कार्यकर्ता सीएम शिवकुमार नायकले राजस्थान रोयल्स फ्रेन्चाइजविरुद्ध बालश्रमको आरोपमा प्रहरीमा एफआईआर दायर गरेक छन् ।
नायकले वैभवलाई व्यावसायिक क्रिकेट खेल्न लगाएर बालअधिकार र बालश्रमसम्बन्धी कानुन उल्लङ्घन गरेको दाबी गरेका छन्। वैभवको उमेरलाई ध्यानमा राख्दै पढाइमा बाधा पुग्ने र बालकको शोषण भइरहेको उनको भनाइ छ । उनले रोयल्स व्यवस्थापनलाई कारबाही गर्न माग गरेका छन्।
वैभव सूर्यवंशी बिहारका युवा ओपनर हुन्, जसले मात्र १२ वर्षको उमेरमा रणजी ट्रफीमा डेब्यू गरेका थिए। उनी आईपीएल इतिहासकै सबैभन्दा कान्छा खेलाडी बन्दै १३ वर्षको उमेरमा राजस्थान रोयल्सबाट १.१ करोड रुपैयाँमा करार गरे ।
हाल १५ वर्ष पुगेका उनले आईपीएल २०२६ मा उत्कृष्ट प्रदर्शन गरिरहेका छन् र टीमको मुख्य ओपनरको भूमिकामा छन्। तर सामाजिक कार्यकर्ताले यो सहभागितालाई बालश्रम ठहर गर्दै कानुनी कारबाहीको चेतावनी दिएका थिए। केही रिपोर्टका अनुसार उक्त एफआईआर दायर भइसकेको छ भने केही स्रोतले अझै धम्कीका रूपमा रहेको बताएका छन्।
भारतको बालश्रम निषेध ऐन २०१६ ले खेलकुदलाई केही हदसम्म छुट दिएको छ, तर शिक्षा र बालकको हित संरक्षण गर्नुपर्ने प्रावधान छन्। बीसीसीआईको नियमअनुसार पनि पहिलो श्रेणीको क्रिकेट खेलिसकेका खेलाडीलाई उमेरको आधारमा खेल्न अनुमति छ।
वैभवले आफ्नो स्कुलिङलाई निरन्तरता दिइरहेको परिवारको दाबी छ। यसअघि पनि उनको उमेर विवादमा चर्चा भएको थियो, तर आधिकारिक दस्तावेजअनुसार उनी १५ वर्षका छन्।
